-Almmuhus-
-Almmuhus-
OĐĐASATEurohpáráđđi sihtá Norgga suddjet unnitlogugielaid

Eurohpáráđđi sihtá Norgga suddjet unnitlogugielaid

-

-

Eurohpáráđi mielas galggaše Norgga eiseválddit bargat eanet dan nammii ahte sihkkarastit unnitlogugielaid Norggas; julevsámegiela, lullisámegiela, kvenagiela, suomagiela ja romanesgiela.

Eurohpáráđi ekspeartalávdegoddi lea árvvoštallan Norgga čuovvoleami Eurohpá lihtu unnitlogugielaid dáfus, ja sis leat máŋga konkrehta ávžžuhusa dasa mii guoská guđe guovlluin Norga galggašii eanet bargat. 

Norggas lea davvisámegiella, julevsámegiella, lullisámegiella, kveanagiella/suomagiella ja románi-/romanesgiella meroštallojuvvon unnitlogugiellan. 

Lávdegoddi oaivvilda ahte davvisámegiela gielladilli lea dohkálaš ja konkluderejit dainna ahte measta buot ovdalaš rávvagat leat čuvvojuvvon. Lávdegoddi seammás rávve ahte galggašii dahkkojuvvot eambbo nannen dihte sihke davvisámegiela ja eará sámegielaid geavaheami buhcciidruovttuin ja eará fuollaásodagain, ja čujuhit maid dasa ahte ain leat hástalusat dasa mii guoská sámi bustávaid geavaheapmái almmolaš registariin. 

 

Dárbbašit eanet oahpaheddjiid

Lávdegoddi lea eanemusat fuolastuvvon lullisámi, julevsámi, kvena-/suomagiela ja románi-/romanesgiela gielladiliin.  

Julevsámegiella ja lullisámegiella leat ain hearkkes dilis. Váldohástalusat dáid gielaid ektui lea oahppavuogádat ja geavaheapmi almmolaš bálvalusain, čuožžu raporttas. 

Lullisámegiela dilli lea hearki danne go váilu oahpahus gielas, dieđiha lávdegoddi. Sii maid ávžžuhit ahte oahpaheaddjeoahppu nannejuvvo ja ahte buot dásiid oahpahus šattašii eanet olahanmuttus. Raporttas nai čujuhuvvo dasa ahte gávdnojit hirbmat unnán mediafálaldagat lullisámegielagiidda. 

Kvena-/suomagiella lea maid ain rašes dilis, oaivvilda lávdegoddi. Lea ain dárbu doaimmaide mat ovdánahttet oahpahusa dán guovtti gielas.

Dán dieđiha NTB

-Almmuhus-