-Almmuhus-
OĐĐASATEU-parla­mentihkká­riidda muita­lan sámi rahča­mušaid birra

EU-parla­mentihkká­riidda muita­lan sámi rahča­mušaid birra

-

-

– Mus lea jáhkku ahte lea olu vuoitit jos dagaha Sámi dovddusin Brusselis ja EU:s, go sáhttet váikkuhit lágaid, resurssain ja ráhkadit saji beavdde lusa, čállá sámediggepolitihkkár Runar Myrnes Balto.

Runar Myrnes Balto lea leamašan Romssas gos lea doallan sáhkavuoru Sámi ja sámi dilálašvuođaid birra.

Diimmu hállan sámiid birra

– Mun ledjen bovdejuvvon dohko doallat EU-politihkkáriidda ovtta ovdasáhkavuoru sápmelaččaid birra ja sámi servodagaid birra. Mun lean geahččalan čilget sihke min historjá, min kultuvrra ja maiddái stuorra hástalusaid mat mis leat. Ovdamearka dihtii sisabahkken áššiide ja gielaid birra ja nu, mus lei diibmu nu ahte mun muitalin  dan maid mun navden galgá vai oažžu buori gova mo sámi servodat lea, muitala Runar Myrnes Balto.

Balto muitala ahte son maid namuhii giđđaloddema Guovdageainnus.

– Dat lea hui buorre ovdamearka mo stáhta hálddašanpolitihkka šaddá áibbas vuostá dan báikkálaš riektaáddejumi ja báikkálaš árbevieru, ja dat lei sin mielas hui miellagiddevaš gullat justa dan giđđaloddema birra, dadjá Balto.

Doaivu doppe lea olu viežžat

– Dat lea hui buorre ahte parlamentihkkárat bohtet deike sápmái ja háliidit oahppat eambbo min guovllu birra. Dat leat bovdejuvvon ásahusas man namma lea Davvi-Norgga Eurohpa-kantuvra mii lea fylkkaid EU-kantuvra, mun jáhkán dat geat eaiggádit dan lea Romssa ja Finnmárkku fylka ja Nordlándda fylka. Muhto sii dat ledje bovden parlamentihkkáriid mielde ja leat ráhkadan oalle viiddis prográmma sidjiide dáppe Davvi-Norggas ja mun lean hui ilus go maiddái bidjet sisa sámi áššiid dan mátkái, dadjá Balto.

Balto dadjá ahte son jáhkká ahte mis lea hui olu maid mii sáhttit viežžat Brusselis ja EU:s.

– Sápmelaččat eai leat leamaš nu olu doppe, mii leat eambbo fokuseren hukset min vuogádaga ja min saji ON vuogádagas. Muhto dat leat hui stuorra vejolašvuođat EU:s, sihke danin go ollu sápmelaččat orrot Ruoŧas ja Suomas mat leat EU-riikkat, muhto maiddái dan dihte go doppe lea hui stuorra fápmu. Dat sáhttet ráhkadit lágaid Brusselis maid maiddái Norga ferte čuovvut, ja doppe lea oalle olu ruhta. Nu ahte jos mii sápmelaččat sáhttit doppe hukset min iežamet ja eambbo čájehit ja šaddat eambbo dovddusin doppe EU-parlamentihkkáriidda ja Brusselis, de mun jáhkán dat lea hui buorre sámi áššiide, muitala Balto.

Sámi vahkku olgoriikas

Balto muitala ahte doppe maid leat hállan lágiidit sámi vahkku Brusselis guovtti jagi geahčen.

– Dat lea 2022:s, lea vel guokte jagi dassážii. Nu go mun áddejin, de lea sin mielas buorre jurdda, mun gal jáhkán ahte muhtumat sis bohtet maiddái searvat dan vahkkui. Sámediggi ii bargga njuolga dainna muhto Sámediggi lea leamašan mielde doarjumin dan prošeavtta, muitala Balto.

-Almmuhus-