-Almmuhus-
-Almmuhus-
-Almmuhus-
OĐĐASATEU háliida gieldit plastihkkadávviriid

EU háliida gieldit plastihkkadávviriid

-

-

EU-kommišuvdna árvala gieldit ovttaháválaš plastihkkabuktagiid dego bummolullosákkiid, njammanbohcciid, borranneavvuid ja tallearkkaid.

– Lea dehálaš ahte olbmot eai ádde árvalusa boastut. Eai buktagat jávkka, muhto galget ráhkaduvvot eará ávdnasis ja dalle besset olbmot dáid geavahit buori oamedovdduin, dadjá EU-kommišuvnna várrepresideanta Frans Timmermans. 

 

Unnidit plastihkkageavaheami

EU-kommišuvnna ulbmil lea unnidit plastihkkanuoskkideami Eurohpás, ja danin árvalit maiddái ahte riikkat galget ásahit doaibmabijuid mat unnidivččii plastihkkageavaheami borramušbuvttadeami oktavuođas.

Dasa lassin galggašii plastihkkagohpuid geavaheapmi njiedjat ja 90 proseantta plastihkkabohttaliin galggaše resirkulerejuvvot.

EU-kommišuvdna árvala maid čavget njuolggadusaid fitnodagaid ektui mat buvttadit guolástusávdnasiid. Guolástusrusttegat leat 27 proseantta doabbariin mat levvet riddogáttiide. 

 

Gusket maiddái Norgii

EU-kommišuvdna deattuha ahte juohke riika ferte váldit ovddasvástádusa čuovvulat árvaluvvon njuolggadusaid.

EU-kommišuvdna oaivvilda ahte dát maiddái galgá guoskat EØS-riikkaide. Dat mearkkaša ahte ođđa njuolggadusat maiddái gusket Norgii.

Dálkkádat- ja birasministtar Ole Elvestuen sávvá gildosii ja doaibmabijuide bures boahtima.

— Dán lean vuorddašan ja árvalus gal illudahttá mu. Mii áigut farggamusat árvvoštallat árvalusa ja álggahit álgobargguid dán ektui. Ii gávdno makkár ge sivva manne galggašii maŋidit doaimma, dadjá Elvestuen NTB:i.

 

 

-Almmuhus-