-Almmuhus-
OĐĐASATEU doaibma CWD-dávdda vuostá sáhttá čuohcat boazodollui Norggas

EU doaibma CWD-dávdda vuostá sáhttá čuohcat boazodollui Norggas

-

-

Eanandoalloministtar Jon Georg Dale ballá ahte EU hilgugoahtá importeremis Norgga bohccobierggu go ballet ahte CWD-dávda sáhttá leavvat.

Bivdit leat báhčán máŋgačuođi gotti Nordfjella guovllus, vai bissehit dávdda. Eanandoalloministtar ballá ahte EU bidjá beare alla njuolggadusaid.

Bearjadaga iđit deaivvada eanandoalloministtar Jon Georg Dale EU- komisearain Vytenis Andriukaitisain ja galgaba čielggadit dili.

– Mii leat ieža ráhkadan eksporterennjuolggadusaid mat gullet daidda guovlluide go dávda lea gávdnon. Dál orru EU-kommišuvdna áigume viiddidit njuolggadusaid. Min mielas ii leat dat dárbbašlaš, lohká Dale.

 

Čuohcá Finnmárkui

Dale lea vuorjašuvvan go EU-komiseara lea árvvoštallan hilgut importeremiid guovlluin gos ii leat gávdnon dávda.

Ođđa EU-doaimmat sáhttet čuohcat Finnmárkku boazodollui, gos leat ollu iskosat dahkkon, muhto ii leat oba ge gávdnon dávda.

 

Ráhkadit gozihanprográmma

EU miellahttoriikkat eai leat nu viidát guorahallan lea go dávda sin riikkain maid, oaivvilda Dale.

EU lea ráhkadeame gozihanprográmma mii galgá bistit golbma jagi. Elliin Ruoŧas, Suomas, Litauenis, Latvias, Estlánddas ja Polenis galget váldit iskosiid.

– Ii leat sihkar ahte dát dávda ii gávdno Norgga ránnjáriikkain lagamus mánuid ja jagiid, lohká EU-kommišuvnna ságadoalli Anca Paduraru.

 

Go dávda vuos lea gávdnon, de lea issoras váttis jávkadit dan, deattuha son.

– Kommišuvnnas lea stuora beroštupmi jođánit ja beaktilit bargat.

(©NTB)

-Almmuhus-