-Almmuhus-
OĐĐASATErna Solberg vástidii mánáid jearaldagaid korona birra

Erna Solberg vástidii mánáid jearaldagaid korona birra

-

-

Mánáin leat olu jearaldagat koronadávdda birra. Geahča maid mánát imaštallet ja makkár vástádusaid ožžo preassakonferánssas mii lágiduvvui mánnodaga stáhtaministara kantuvrras.

NRK Supernytt ja Aftenposten Jr leat nuoramus lohkkiid jearaldagaid ovddidan Norgga stáhtaministarii mánnodaga.  Mánát ja nuorat besse jearrat koronadávdda birra preassakonferánssas mii lágiduvvui dušše mánáid váste.

Dá lea maid stáhtaministtar Erna Solberg dajai álgosártnis preassakonferánssas:

– Ráhkis buohkat!

– Dál leat leamaš erenoamáš beaivvit: Skuvllat ja mánáidgárddit leat gitta. Buot valáštallamat ja astoáigedoaimmat leat loahpahuvvon. Ja buohkat geat leat fitnan olgoriikkas fertejit leat erremis go ollejit ruoktot fas. Lea koronadávdda dihte go árgabeaivi lea nu earálágán sihke rávesolbmuide ja mánáide.

Buohkat geat sáhttet bissut ruovttus, berrejit dahkat dan olles áiggi dál. Ollu mánáid mielas sáhttá dat orrut ilgat. Dan mun ipmirdan bures. Lea lohpi leat balus go dáhpáhuvvet ná olu stuora áššit oktanaga. Lea lohpi veahá ballat koronadávdda njoammumis, muhto eatnasiidda ii leat koronadávda várálaš. 

Mánát geat ožžot koronadávdda buhcet dušše veahá, dego dábálaš golgodávddain. Ollugiidda ii ge bastte dávda vehášge. Vaikko dávda njomošii olles du skuvlii, de manná bures measta buohkaiguin doppe.  Seamma guoská eadnái ja áhččái, jus soai oažžuba dan dávdda. Rávesolbmot, geain lea dearvvaš rumaš, eai buoza nu garrasit.

Koronadávda sáhttá leat várálaš olbmuide geain leat duođalaš buozalmasvuođat. Sáhttá maid leat várálaš vuorasolbmuide.

Mii fertet bargat maid sáhttit vai sidjiide ii njoamo dát dávda. Lea dehálaš muitit ahte buohkat, geat buohccájit Norggas, ožžot hui buori divššu buohcceviesus. Mis leat čeahpes buohccedivššárat ja doaktárat geat váldet mis vára. Buot buoremus lea ahte nu ollugat go vejolaš eai oaččo dán dávdda oba ge. Dat lea sivva go juohke sajis lea gitta ja šluhttejuvvon lágideamit.

Jus eat deaivvat, de eat njoamut viidáset dávdda. Dieđán maid ahte olu diŋggat šaddet váivin árgabeaivvis. Ollugat leat šaddan šluhttet riegádanbeaidoaluid. Dat ii leat somá. Sáhttá leat láittas bissut olu ruovttus, ja lea váivi maid go ii beasa olbmáiguin deaivvadit nu go ovdal, muhto go bissu ruovttus, eret skuvllas ja astoáigedoaimmain, de veahkehat don maid nu ahte olbmuide ii njoamo dávda ja buohccájit.

Dán preassakonferánsii leat boahtán ollu buorit gažaldagat dis, maid mii áigut vástidit. Mu mielde leaba Guri Melby ja Kjell Ingolf Ropstad.

Guri lea máhttoministtar ja lea buot Norgga skuvllaid ja mánáidgárddiid jođiheaddji. Kjell Ingolf lea mánáid- ja bearašministtar, ja su doaibma lea bargat nu ahte buot mánáin ja bearrašiin lea buorre dilli. Goappašagat galgaba dadjat moadde sáni ovdal go mii vástidit gažaldagaid.

NRK Supernytt čállá ahte jus oaččut váivves jurdagiid, jus balat, jus dus šaddá váivi lohkat ja gullat dáid áššiid birra, de fertet hupmat rávesolbmuin geasa luohtát. Dá leat muhtin jearaldagat:

– Mii lea korona ja covid-19? 

: Koronavirus, dahje «dat ođđa koronavirus» lea virus mii sáhttá čuohcat geahppáide, nu ahte buohcagoađát čottabákčasiin, njunis ja geahppáin. Jus buohcagoađát koronavirusiin, de gohčoduvvo dávda covid-19.

– Man guhká bistá dávda?

: Eatnasat geat buohcagohtet koronavirusiin dearvvašnuvvet guovtti vahkkus.

– Goas rahppo fas skuvla?

: Skuvla rahppo fas go njoammun unnu ja šaddá eanet dorvvolaš ollugiidda fas ovttastallat. Eat dieđe vel goas dat šaddá vuos.

–Man stuora várra lea jápmit koronain?

: Jus don leat muđuid dearvvaš, de ii leat dát dávda vearrát go dábálaš influeansa golgodávda. Lea dehálaš váruhit vuorrasiid, dahje geain leat dávddat mat dahket ahte sin rumaš ii nagot virusa vuostá doarrut.

– Mun balan ahte mu áhkkui njoammu dávda. Movt sáhttit hehttet midjiide njoammumis?

: Buoremus vuohki eastadit dávdda njoammumalea deaivvadit earáiguin nu unnán go vejolaš. Nu ahte don ja du áhkku eahppi berre deaivvadit juste dál. Buoremus lea bissut ruovttus ovttas singuin geaiguin dábálaččat orut ovttas. De fertet leat čeahpit gieđaid bassat go leat olgun finadan, it ge duohtadit diŋggaid masa ollugat leat guoskan.

– Lea go dát várálaš mánáide?

: Eai leat nu olu mánát geat buhcet koronadávddain. Orru leamen nu ahte mánát eai buoza dainna nu olu go nuorat ja rávisolbmot.

– Manne njoammu koronavirus nu jođánit?

: Koronavirus manná jođánit danne go njoammu álkit. Virus sáhttá leat goaikkanasain mat bohtet sus gii lea buohcci ja go son gossá dahje gastá. Jus dat goaikkanasat leat uksageavjjas dahje eará sajis gosa olbmot gusket, de sáhttá sidjiide njoammut virus mii ceavzá guhká dan olggožis.

– Sáhttá go olgun stoahkat? Ferte go orrut viesus čađat áiggi?

: Don sáhtát olgun stoahkat, muhto ii ovttas ollugiiguin oktanaga, ja áinnas seamma olbmuiguin juohke háve. Lea buoremus stoahkat dakkár stohkosiid main ehpet dárbbat leat nu lahkalaga.

Geahča olles preassakonferánssa dás. Sátta lea dárogillii:


-Almmuhus-