ON eamiálbmotvuoigatvuođaid erenoamášraporterejeaddji moittii Suoma Geneves ikte go dát ii leat gullan ja váldán vuhtii sápmelaččaid meahciráđđehuslága ođasmahttinproseassas.
ON eamiálbmotvuoigatvuođaid erenoamášraporterejeaddji moittii Suoma Geneves ikte go dát ii leat gullan ja váldán vuhtii sápmelaččaid meahciráđđehuslága ođasmahttinproseassas.
Ovttastuvvan Našuvnnaid eamiálbmotvuoigatvuođaid erenoamášraporterejeaddji Victoria Tauli-Corpuz lea fuolas Suoma ođđa meahciráđđehusláhkaárvalusa váikkuhusain sápmelaččaide, čállá odne Yle Sápmi.
Tauli-Corpuz buvttii ášši ovdan ikte 17. beaivvi juovlamánu Geneves. Ovttastuvvan Našuvnnaid eamiálbmotvuoigatvuođaid erenoamášraportereaddji moaitá Suoma das, ahte dát ii leat gullan ja váldán vuhtii sápmelaččaid eamiálbmogin meahciráđđehuslága ođasmahttinproseassas.
– Suoma ráđđehusa meahciráđđehusláhkaárvalus ii šat sihkkarastte sápmelaččaid vuoigatvuođaid árbevirolaš ealáhusaide, eatnamiidda ja resurssaide. Dát sihkkarastimat ledje láhkahápmosis vel jagi 2014, fuopmášahtii Tauli-Corpuz.
Dálá meahciráđđehusláhkaárvalus sirddášii stuorra oasi sápmelaččaid ruovttuguovllus ođđa, stáhta oamastan fitnodahkii. Ođđa fitnodat boahtá leat ovddasvástádusas buot Suoma stáhta oamastan vuvddiid čuohppamiin, maiddái sámeguovllus.
– Stáhtat galggašedje gullat eamiálbmogiid ja sihkkarastit, ahte sis lea vuoigatvuohta ovddalgihtii dohkkehit áššiid, ovdalgo ieža dohkkehit ja ollašuhttet lágaid ja hálddahuslaš doaibmabijuid, mat čuhcet sidjiide, čujuhii ON Álgoálbmotjulggaštusa tekstii.
