Ráđđelahttu Ann-Mari Thomassen lea duhtavaš go juolludedje ruđa Nuorta-Sálttu gründerforumii Rággui. – Prošeakta lea min mielas hui gelddolaš.
Ráđđelahttu Ann-Mari Thomassen lea duhtavaš go juolludedje ruđa Nuorta-Sálttu gründerforumii Rággui. – Prošeakta lea min mielas hui gelddolaš.
Sámediggeráđđi čállá preassadieđáhusas sii leat juolludan 11,1 miljon ruvnno sámi áigumušaide guovvamánu rájes miessemánu álgui.
Ođđa gründerforum Nuorta-Sálttus, ja sámi dáidaga ja kultuvrra riikkaidgaskasažžan dahkan gullet daidda doaibmabijuide mat leat ožžon doarjaga. Dat boahtá ovdan Sámedikki raporttas dan birra maid sii leat čađahan ovddit dievasčoahkkima rájes njukčamánus.
Háliida nuoraid doarjut
Ráđđelahttu Ann-Mari Thomassen vuorddaša iluin maid Nuorta-Sálttu gründerforum – Rággu – buktá regiovdnii.
– Geasuheaddji báikegottit, gosa olbmot háliidit ássat, dárbbašit movttegis ealáhushutkiid ja buriid báikkálaš birrasiid ealáhusovddideapmái. Ealáhushutkit geat leat Rággu duogábealde, háliidit láhčit aiddo dasa Nuorta-Sálttus ja prošeakta lea min mielas hui gelddolaš. Erenoamáš deaŧalaš lea nuorra ealáhushutkiid čalmmustahttit, čállá Thomassen.
Vai eai fárre
Son oaivvilda ahte go Rággos čalmmustahttá nuorra ealáhushutkiid Nuorta-Sálttus, de dat nannet prošeavtta erenoamážit, go dat sáhttá veahkkin oažžut nuoraid bissut smávit báikkiin vai eai fárre stuorra gávpogiidda.
Viidáseappot lea sámediggeráđđi juolludan doarjaga máŋgga prošektii maid áigumuš livččii oahpásmahttit sámi dáidaga ja kultuvrra olgoriikii.
– Sámi dáiddárráđđi lea ožžon doarjaga prošektii Sámi Contemporary in Berlin, Sámi Teáhtersearvi lea ožžon doarjaga Sami Performing Arts Festival in NYC:ii ja Audioland AS lea ožžon doarjaga Sami Culture in Cuba:ii, muitala son.
