Sii eai leat goassege čuojahan almmolaččat ovdal. Dál lea Háldi joavkkus fáhkkestaga juo áibbas ođđa EP skearru, mii almmuhuvvo beaivvi maŋŋel Sámi Grand Prix.
Vuosttaš beassášbeaivvi almmuha Háldi ođđa EP, man namma lea Suoivvanasain.
Suoivvanasain lea ge maid dat lávlla mainna beassášlávvordaga gilvalit Sámi Grand Prixas (SGP). Lassin SGP-lávlagii, leat vel golbma eará sámegiel lávlaga sin skearrus,
– Dat leat dakkár teavsttat mat leat hui govalaččat, ja mu mielas leat maid hui liekkus teavsttat, muitala lávlu Anne Gro Gaup. Son bargá beaivválaččat Ávvira typográfan ja golmma lávlagii leat ges Ávvira váldodoaimmaheaddji Kari Lisbeth Hermansen čállán teavsttaid.
Jođánis joavku
Earret lávlu Anne Gro Gaup, čuojaheaba leavdnjalaš Knut Eilif Bakkevold ja kárášjohkalaš Trond Even Kåven Kaaby Háldi joavkkus. Sii leat álgán ovttasbargat easkka guovvamánu birrasiid, ovdalaš áigemeari go galge sáddet lávlaga SGP:ii. Sii eai leat ovdal goassege čuojahan fárrolaga almmolaččat.
– Mii livččiimet sihkkarit almmuhan EP vel ovdal, muhto dan lávlaga ii beasa čuojahit almmolaččat ovdal SGPilvvuid. Mii leat maid hui jođánit ráhkadan dán skearru. Eat ádjánan eambbo birrasiid guokte vahku, ja leat dušše bargan vehážiid mielde, muitala lávlu.
Improviseren
– Knut ja Treven leaba ráhkadan dan musihkkii juogalágán komppa, ja de lean mun ráhkadan lávlunmelodiija ja heivehan dan teavstta sisa. Go mun mannen studioi, ii lean mearriduvvon juste makkár lávllai galggai leat, muhto ledjen jurddašan gal movt galgá mannat dat melodiija ja makkár dovddu galggai addit. Lei vehá dakkár improviseren, dadjá Anne Gro Gaup.
Son boagusta go juohkediŋga lea dápáhuvvan hui fáhkkestaga Háldi joavkkuin.
– In mun dieđe manne, muhto lea somá leat spontána, ja fuomášit ođđa vugiid dađistaga. Eat leat gal juste máŋga jagi hupman vuos ásahit joavkku. Muhto ná lea hui somá, hui jođánit goit oaidná maid bohtosiid.
Ožžon Anja Storeng mielde
Fáhkka dat bođii su čuoiganhástalus maid. Anne Gro lea oainnat lohpidan ahte son čuoigá Saami Ski Race golmma miilla gaskka jus vuoitá SGP, vuolppuin.
– Jurddašin ferte juoidá fuomášit vel suohttasa čađahit jus juo vuoitá. Lean hástalan eará oasseváldiid maid lohpidit juoidá jus vuitet. Dán rádjai lean ožžon Anja Storeng váldit hástalusa. Son áigu čuoigat 4,5 miilla Tornedalčuoigamiin. Šaddá hui gelddolaš dát, dadjá Gaup.
