Elrávdnjehattit leat loktanan ja jagi divraseamos mánnu láhkonišgoahtá. Haddelokten čuohcá olbmuid juovlaávvudeapmái, čájeha ođđa guorahallan.
YouGov lea čađahan guorahallama miehtá Norgga, ja bohtosat suorggahit sin.
– Mii vuorjašuvvat go oaidnit ahte olbmot eai váldde sihkarvuođa nu duođalažžan, go elrávdnji lea divron. Eambbosat dolastit, boldet eambbo gintaliid ja bidjet bassanmašiinnaid johtui ihkku. Dát sáhttet dágahit eambbo buollimiid, dadjá If gulahallanjođiheaddji Sigmund Clementz preassadieđáhusas.
Čuohcá ávvudeapmái
Juovllaid ja ođđajagiruohta áigge leat eambbo buollimat, deattuha son. Sii geat leat vástidan guorahallama, leat ožžon gažaldaga: «Mo jáhkát elrávdnjehattit váikkuhit juovlaávvudeapmái?». Measta 1000 olbmo leat vástidan guorahallama, ja sidjiide čuohcá dat iešguđet láhkai.
Muhtimat vástidedje ahte šaddet hálbbes juovlaskeaŋkkaid oastit, muhtimat ges ahte šaddet eambbo dolastit, muhtimat eai ráske bidjat bassanmašiinnaid johtui ovdal ihkku go elrávdnji hálbu, earát ges eambbo gintaliid boldet, muhtimat fertejit ráhkadit eará juovlabiepmu go dan maid lávejit, earát ges šaddet okto ávvudit juovllaid go eai ráske deavdit boaldámuša biilii.
36 proseanta vástidedje ahte elrávdnjehaddi ii čuoza sin ávvudeapmái, 8 proseanta ges ahte sis ii leat divrras elrávdnji.
Clementz ávžžuha olbmuid bidjat bassanmašiinnaid johtui go ieža leat gohcimin. Jus šaddá dan dillái ahte mašiinnat buollájit, de leat buoret vejolašvuođat čáskkadit buollima go lea gozuid alde.
– Sáhttá bidjat mašiinnaid johtui eahkes, muhto dan mađe árrat ahte dat leat geargan dassá ieš nohkat, muitala son.
