-Almmuhus-
-Almmuhus-
KULTUVRAEllinor Guttorm Utsi – bohccobiergogaskkusteaddji 2015

Ellinor Guttorm Utsi – bohccobiergogaskkusteaddji 2015

-

-

Deanu nisu Ellinor Guttorm Utsi oaččui «Jagi bohccobiergogaskkusteaddji 2015» -bálkkašumi njukčamánu 7. beaivvi go bohccobiergofitnodagain lei jahkásaš čoahkkin Romssas.

Ellinor Guttorm Utsi lea bearašfitnodaga Davvi Siidda bokte ásahan ollislaš mátkeealáhusbuktaga mas leat vuođđun luondu, sámi kultuvra ja sámi biepmut.

– Ellinor Guttorm ánssášii vuoitit ja oažžu ge bálkkašumi dan ovddas maid son ja su bearaš leat bargan, dadjá biebmoministtar Jon Georg Dale Eanandoallo- ja biebmodepartemeantta neahttasiiddus.

– Davvi Siidda fitnodat lea huksejuvvon iežaset čehppodagain ja vásáhusaiguin, ja fállet ge buktagiid main lea dássi ja maid márkan háliida. Mun sávan bálkkašupmi movttiidahttá ovdánahttit iežaset doaimmaid, dadjá Dale.

 

Áŋgir ja sávri

Eanandoallo- ja biebmodepartemeanta čállá viidásat ahte Ellinor Guttorm Utsi áŋgirvuođain ja sávrivuođain lea ásahan iešguđetlágan doaimmaid main lea vuolggasadji iežas boazodoallu. Buohkat bearrašis barget boazodoaluin ja turisttaiguin, ja fállet iežaset máhtu sámi kultuvrras ja boazodoalus.

Utsi bearraša váldoealáhus lea ge boazodoallu. Sin dálveorohat lea Deanu gielddas ja geasseorohat Čorgasis. Ellinor Guttorm Utsi lea maiddái dovddus duojár.

 

Jury rámida ollu beliid

Jurys leat mielde dat guokte boazodoallošiehtadusa jođiheaddjit, namalassii Eanandoallo- ja biebmodepartemeantta ekspedišuvnnahoavda Anne Marie Glosli ja Norgga Boazosápmelaččaid Riikkasearvvi jođiheaddji Ellinor Marita Jåma. Dasa lassin goalmmát lahttu Bohccobierggu Márkanastinlávdegotti jođiheaddji John Anders Lifjell.

Sii leat earret eará deattu bidjan dasa go Ellinor Guttorm Utsi positiiva láhkái gaskkusta boazodoalu buriid beliid. Jury maiddái dadjá ahte Ellinor Guttorm Utsi ja bearaš ellet boazodoaluin ja sin doaimmat leat oassin iežaset boazodoalus. Konseapta lea ge jury mielas albma, hui álkit ráhkaduvvon, muhto liikká hui albma ja jáhkehahtti.

Dasa lassin namuha jury dan go Ellinor Guttorm Utsi lea láidesteaddji nisu boazodoalus, go iežas doaimmaid bokte oainnusmahttá boazodoallonissoniid. Jury namuha viidásat ahte son duddjomiin čájeha ráhkisvuođa iežas kultuvrii ja álbmogii ja čehpet hálddaša sámi kulturárbbi.

 

-Almmuhus-