Importerejuvvon halalbiergu sáhttá njuvvojuvvon jámálgahttima haga. Elliidsuodjalus oaivvilda dákkár bierggu fertet merkejuvvot ja dáhttot Geavaheaddjiráđi oččodit dán sadjái, čállá NTB.
Ovddeš eanandoalloministtar ja ovddádusbellodaga Bård Hoksrud lea cealkán ahte ii leat vejolaš oažžut sadjái gildosa mii gieldá sisafievrridit bierggu mii ii leat merkejuvvon.
Dán geažil dáhttu Elliidsuodjalus merkegoahtit dákkár bierggu.
Válljet merkejuvvon bierggu
– Geavaheaddjit ieža galget beassat válljet bierggu eallis mii lea jámálgahtton ovdal go lea njuvvon. Eatnasat gal áddejit ahte lea dohkketmeahttun čuohpastit čoddaga eallis jámálgahttima haga, dadjá jođiheaddji Åshild Roaldset Dyrebeskyttelsen:s preassadieđáhusas.
Nortura loahpahii šiehtadusa
Muslima organisašuvnnas, Islamsk Råd Norge:s (IRN), lei olu jagiid šiehtadus Nortura njuovahagain sertifiseret halalnjuvvojuvvon bierggu Norggas.
Jagis 2017: s mearridii Nortura loahpahit šiehtadusa IRN:ain. Das rájes ii leat Norggas leamaš oktage guhte njuovvá elliid halalsertifiserema mielde.
Nationen dieđuid mielde de dáidá halalbiergosisafievrrideapmi lassánit dál go dát šiehtadus lea loahpahuvvon. Maiddái olu muslimat ohcalit ortnega mii dárkkista halalbierggi. Dán čállá NTB.
