Finnmárkulaš Trond Eirik Nilsen lea Gonagasa Stáhtaráđis nammaduvvon Finnmárkku politiijaguovllu ođđa várrepolitiijameašttirin.
Finnmárkulaš Trond Eirik Nilsen lea Gonagasa Stáhtaráđis nammaduvvon Finnmárkku politiijaguovllu ođđa várrepolitiijameašttirin.
Nilsen lea doaibman virggis ođđajagemánu 1.beaivvi 2016 rájes, ja lea maid ovdal bargan Nuorta-Finnmárkku várrepolitiijameašttirin ja Nuorta-Finnmárkku PST jođiheaddjin.
– Mun lean hui duhtavaš nammademiin ja lean áibbas sihkar ahte mii leat ožžon rievttes gelbbolašvuođa sadjái, dadjá politiijameašttir Ellen Katrine Hætta.
Várrepolitiijameašttir galgá leat politiijameaštára olgešgiehta ja su sadjásažžan. Váldobarggut ovddos guvlui leat boahtit johtui Finnmárkku politiijaguovllu ođđa organiseremiin, buoret resursageavaheapmi ja buoridit Finnmárkku álbmoga gearggusvuođa.
Nanu politiijaduogáš
Trond Eirik Nilsen lea eret Guovžajávrris, Mátta-Várjjagis. Sus lea nanu duogáš politiijan.
– Lea hástaleaddji ja gelddolaš bargu, mas lea servvodatdoaibma mii hásttuha mu. Go beassá dahkat erohusa, leat mielde Finnmárkku servvodaga dahkame oadjebassan lea mávssolaš ja addá munnje ollu. Mis leat hui čeahpes, máhtolaš ja áŋgiris mielbargit. Lean hui ilus ja njuoras go beasan ovttas bargat dákkár olbmuiguin fylkkas mainna mun áŋgirušan, muitala aiddo nammaduvvon várrepolitiijameašttir.
Guokte finnmárkulačča
Maŋŋel nammadeami leat njunuš jođiheaddjit Finnmárkku politiijaguovllus guokte finnmárkulačča geain lea nanu gelbbolašvuohta. Hættas lea juridihkalaš ámmáteksámen ja duogáš áššáskuhttieiseválddiin, ja Nilsenis lea politiijaallaskuvla ja lea gorgŋon iešguđet politiijasajádagaid.
– Dainna lágiin heivejetne bures oktii. Go letne goappašagat finnmárkulaččat ja lea áigumuš bissut dáppe, de dat dahká ahte lea stáđis jođiheapmi. Ii goabbáge munnos leat guossebargin fylkkas, dadjába soai.
Várrepolitiijameaštára virgi lea guđa jahkái mearreáigi.
