-Almmuhus-
OĐĐASATElle Mari buvttadiš­goahtá Sámi Beassáš­márkaniid

Elle Mari buvttadiš­goahtá Sámi Beassáš­márkaniid

-

-

Sámi musihkkafestivála lea mearreáigái virgádan Elle Mari Dunfjell Oskala (24) Sámi Beassášmárkaniid buvttadeaddjin mii lea Guovdageainnus.

Elle Mari galgá ovttasbargat festivála buvttadeddjiin Ol Johan Gaupain ja festiválajođiheddjiin Ken Are Bongoin, čállet sii preassadieđáhusas. – Son lea máŋga jagi áŋgiruššan festivála bargoveagas ja sus lea leamaš ovddasvástádus rekrutteret ja koordineret eaktodáhtolaš bargiid. Elle Mari virgádeapmi lea offensiiva dahku mii galgá nannet festivála mii stuorru jođánit, čállet sii.

Oahppu ja duogáš lágidemiide

Elle Mari Dunfjell Oskal lea Guovdageainnus eret. Sus lea servodatplánen ja kulturipmárdus bachelor UiT bokte ja liigeoahppu praktihkalaš prošeaktajođiheamis. Son lea maiddái áŋgiruššan ja lágidan deaivvadanbáikkiid Sámi studeantasearvi Davvi-Norggas (SSDN) bokte studeanttaide Romssas. – Sámi Beassášmárkana doalut leat guhká leamaš jagi deháleamos dáhpáhussan munnje ja mun illudan beassat leat mielde festivála ovdánahttimis. Lea niehkobargu go mun beroštan ovddidit ja čalmmustahttit sámi kultuvrra juohke sajis, cealká son. 

50-jagi ávvudeapmi 2021

Jagis 2021 lea 50 jagi áigi go Sámi Beassášmárkanat lágiduvvojedje vuohččan Guovdageainnus. 50-jagi doalut lágiduvvojit 2021 beassážiid njukčamánu 27. beaivvis cuoŋománu 5. beaivái. Festivála áiggiid leat konfirmašuvnnat, ipmilbálvalusat, čájáhusat, teáhterčájáhusat, konsearttat, olgodoaimmat, heargegilvovuodjimat, filbmačájáhusat, doaimmat mánáide ja nuoraide ja Sámi Grand Prix. – Mii leat movttegat go Elle Mari háliida álgit buvttadeaddjin ja illudit suinna ovttasbargat go lágidit min stuorámus kulturfestivála, Sámi Beassášmárkaniid Guovdageainnus, čállet sii.

-Almmuhus-