Deanunieida ja Stjernekamp-gilvaleaddji Ella Marie Hætta Isaksen beasai viidáset lávvordaga gilvvus, ja dál sávvá beassat nu guhkás ahte beassá juoigat lávddi alde.
Deanunieida ja Stjernekamp-gilvaleaddji Ella Marie Hætta Isaksen beasai viidáset lávvordaga gilvvus, ja dál sávvá beassat nu guhkás ahte beassá juoigat lávddi alde.
Mannan lávvordaga ožžo Stjernekamp-gilvaleaddjit hástalusa lávlut opera lávddi alde.
Golmmaš ožžo unnimus jienaid, muhto deanunieida Ella Marie Hætta Isaksen ii lean okta sis. Lei Maria Arredondo gii šattai guođđit gilvvu.
Illuda juoigat
Sotnabeaivvi lea aiddo vudjon ahte lea beassan viidáset. Ella Marie Hætta Isaksen čállá iežas Facebook-siiddus ahte Stjernekamp-gilvu lea addán sutnje olu, muhto dál álgá duohta gilvu.
– Mus lea miella čájehit iežan ruovttušiljus. Eletrovnnalaš dánsunmusihkka boahtá čihččet prográmmas ja luohti gávccát prográmmas – álggos ferten beare beassat blues-gilvvu čađa boahtte lávvordaga, čállá son.
Boahtte lávvordaga galgetge Stjernekamp-gilvaleaddjit lávlut blues-šáŋŋeris. Dat šáŋŋer ii leat Hætta Isaksenii oahpis.
– Lávkestan ođđa vahkkui ja áibbas amas šáŋŋerii, čállá son.
Giitá guldaleddjiid
Ella Marie Hætta Isaksen lei ieš hui ilus ja duđavaš go lea beassan ain viidáset gulvvuin. Son giitá guldaleddjiid Facebookas go dorjot su.
– Lean nu giitevaš go dii doarjubehtet mu. Earenoamážit go lean nu jierásmuvvan go ledjen lávvordaga, čállá son Facebookas.
Manai bures operalávlumin
Guoktelohtjahkásaš Ella Marie Hætta Isaksen luhtii alcces ovdalaš gilvvuid, ja leige válljen váttis lávlaga man galggai lávlut mannan vahkkoloahpa gilvvus.
Liikká manai dat bures, ja duopmárat maid rámpojedje su.
– Mun hirpmahuvven nu ahte vajalduhtten lávllateavstta. Muhto in leat goasse lávlon opera ovdal, nu ahte lean duđavaš, logai Hætta Isaksen NRK:i.
