ISÁK-joavkku lávlu, Ella Marie Hætta Isaksen, searvá boahtte čavčča Stjernekamp-lávlungilvui, ja gilvalage «Norges ultimate entertainer» namahusas.
Gaskavahku dán vahkku almmuhii NRK boahtte čavčča Stjernekamp-gilvvu oasseváldiid namaid.
Okta sis lea Deanu nieida, Ella Marie Hætta Isaksen, guhte lea nuoramusaid searvvis dán jagáš logi oasseváldi gaskkas.
Stuora násti Sámis
Hætta Isaksen lea guhká juo beaggán Sámis, ja son vuittiige Sámi Grand Prix guokte jagi dassái.
Son lea maiddái beaggigoahtán viidábut. Earret eará lávllui son Spellemannbálkkašumis sáddagis, ja maiddái vuittii Hætta Isaksen lávlla «Liet International» lávlungilvvus 2017:s.
Iešguđetlágan musihkkašáŋŋerat
Stjernekamp-gilvvus galget gilvaleaddjit geahččaladdat iešguđetlágan musihkkašáŋŋeriid, ja geahččit galget jienastit iežaset favorihtaid.
Juohke prográmmas geavvá okta oasseváldi olggos gilvvus, ja loahpas báhcá vel čeahpimus lávlu vuoitin.
