– Beakkálmas lávlla, lohkaba soai.
Elin Kåven ja Robin Lynch almmuheaba John Lennona coverlávlaga.
Dan áiguba almmuhit dan dihte go lávlla mearkkaša ráfivuohta. Maŋemus jagiid lea leamaš olu soahti ja guovtteoaivilivuohta Eurohpás ja máilmmis. Álggos globálalaš pandemiija, ja njuolga maŋŋel soahti Eurohpás, ja Oslos stuibmi Pride-mánus, dieđihuvvo preassadieđáhusas.
– Ráfi lea maid fáddá mii guoská eamiálbmogiidda, nu ahte ii lean váttis munnuide gávdnat munno iežame vuolggasaji munno veršuvnnas, dadjába soai preassadieđáhusas.
Ii lean dušše ráhkadit ja almmuhit
Elin muitala preassadieđáhusas ahte sutnje ii lean nu álki dušše ráhkadastit lávlaga ja almmuhit dan. Son ádjánii guhká bargat dainna.
– Ii leat vaikko makkár lávlla. Ádjánin guhká fuobmát movt galggan lávlut vai gudnejahtán dan originála. Ii lean ovdal go nuppi studiomátkkis ahte leimme duđavaččat bohtosiin, lohká Elin.
– Jus John Lennon livčče ain eallime, de livččiime galgan sáhttit geahččat su čalmmiide ja rámisvuođain čuojahit dán veršuvnna.
Elin & The Woodsa John Lennona lávlla «Imagine» veršuvdna almmuhuvvo boahtte bearjadaga.
