Elin-Anna Labba girji bággojohtimiid birra, «Hearrát dat bidje min», oaččui Ruoŧa stuorimus girjjálašvuođabálkkašumi «Augustpriset» fágagirjjálašvuođa suorggis mánnodaga eahketbeaivvi.
Elin-Anna Labba veahka lei okta dain veagain mat šadde bággojohtit Geaggánvuomis Gárasavvonis Váisái ja Johkamohkkái. Girji «Hearrát dat bidje min» lea bággojohtimiid birra ja girji lea ožžon olu fuomášumi sihke Sámis ja maid Ruoŧas. Girji gávdno sihke ruoŧagillii ja sámegillii.
Mánnodaga eahketbeaivvi dieđihuvvui ahte girji vuittii Ruoŧa stuorimus girjjálašvuođabálkkašumi «Augustpriset», kategoriijas «Dán jagáš fágagirji» bálkkašumi. Dat lea okta guđa girjjis mii lea nammaduvvon dan bálkkašupmái.
Elin-Anna lea ilus go oaččui bálkkašumi ja dadjá kommentáras ahte
– Dat lea mu máddariid historjá ja dat lea nu lahka muhto liikká nu guhkkin eret. Mun álgen čállit dan peršovnnalaččat mu iežan dihte, dadjá Labba. Mun dárbbašin dan čállit vai dieđan iežan historjjá, ja gokčan dihte daid ráiggiid mat mus leat leamaš, dajai son TT ođasgáldui.
Augustbálkkašupmi celket ahte
– Dat lea sevdnjes oassi Ruoŧa historjjás. Poehtalaš fámuin čalmmustahttá son bággojohtimiid mat leat gaikkodan sámi sogaid fierpmádagaid ja johtinbálgáid. Girjjis son lea seaguhan muitogovaid, arkiivagovaid ja juigosiid ja dainna lágiin son čalmmustahttá bággojohtimiid mat leat sevdnjes oassi Ruoŧa historjjás.
Augustbálkkašupmi lea bázzi ja 100.000 ruvnna. Nu dieđihit Augustbálkkašupmi iežaset neahttasiiddus.
