-Almmuhus-
KULTUVRAElektrovnnalaš sámemusihkka Ijahis idjii

Elektrovnnalaš sámemusihkka Ijahis idjii

-

-

Ođđaáigásaš sámemusihka njunušnamat Ylva ja Ágy bohtet Anárii Ijahis idja – eamiálbmogiid kulturdáhpáhussii borgemánus.

Ylva lea mystihkalaš njuoratmiessi elektrovnnalaš musihka máilmmis, mii lea aiddobáliid almmustahttimin vuosttas skearru. Joavkkus leat njeallje musihkkára ja áibbas iešguđetlágan musihkalaš duogáža. «Mo árpmuid dii lehpet gávnnadan» ja «Goas fas čuojahehpet dáppe» leat bivnnuheamos gažaldagat Ylvakonsearttaid maŋŋá. Ylva buktá elektrovnnalaš musihka ja eamiálbmotmusihka surggiide juoidá mii ii leat ovdal gullon iige oidnon.

 

Joavkku ovdaolmmoš lea Niillas Holmberg, musihkkár-diktačálli-neavttár Ohcejotgáttis, gean juoigan buktá guldaleaddjiid techno-vuoiŋŋas beroškeahttá lahka luonddu.

Muđuid leat Stefan Kvarnström, Antero Priha ja Asko Keränen mielde Ylva joavkkus.

 


Ágy čuojaha Ijahis Idja festiválas. Preassagovva: Daniel Mikkelsen.

Ágy boahtá

Ágy (Agnete Båtnes Braaten) lea electropop-artista, gii boahtá Norgga beale Sámis. Son čállá šuoŋaidis ođđaáigásaš vugiin sihke eaŋgalas- ja sámegillii. Mielde lea maiddái elemeanttat árbevirolaš luođis. Ágy elektrovnnalaš musihkka vuođđuduvvo nana melodiijaide, hypnohtalaš ritmmaide ja harmonalaš goansttaide.

 

Jagis 2013 Ágy šattai hui bivnnuhin Norggas šuoŋaidis Hjerterått, man son lei čállán NRK Super tv-kanála seammanammasaš tv-ráidui. 2015 Ágy almmuhii EP Arvedávgi, mii loktanii NRK P3 –kanála čuojahanlistui.

Gieskat Ágy čuojahii by:Larm -doaluin mii lea Norgga stuorámus riikkaidgaskasaš musihkkasuorggi ámmátdáhpáhus.

-Almmuhus-