-Almmuhus-
OĐĐASATEinnosta jienastanolahusa Álttás

Einnosta jienastanolahusa Álttás

-

-

 

Álttá suohkana válgahovdejeaddji Bjørn Conrad Berg jáhkká dán jagi ođđa jienastanolahusa suohkanis.

– Lea leamaš stuorra beroštupmi dán jagi, eará jagiid ektui, dadjá Conrad Berg. 2011 válgga oktavuođas jienastedje 2877 olbmo ovdagihtii. Sotnabeaivvi ledje 3626 jienastan Álttás.

– Oktiibuot jienastedje 8341 olbmo mannan válggas. Sotnabeaivvi logut čujuhit dan guvlui ahte šaddá ođđa jienastanolahus, dadjá Conrad Berg.

 

Illusáhka

Válgastivrra jođiheaddji ja dálá sátnejođiheaddji Laila Davidsena mielas lea dát oalle illusáhka, go eará jagiid leat unnán jienasteaddjit geavahan iežaset jienastanvuoigatvuođa: 

– Dát muitala ahte olbmot beroštit mii sin servodagas geavvá. Dat lea hui buorre go Álttás lea hirbmat ovdáneapmi. 

– Jáhkán maid lassáneami leat dan dihte go válgabáikkit leat leamaš olámuttos. Olbmuide lea leamaš álkit jienastit, ja mediat leat leamaš hui čeahpit gokčat válgga ja dieđus politihkkárat bargan buori barggu, dadjá Davidsen.

 

Geavaha jiena

Son ii leat ieš gal vel ollen jienastit, muhto lea jođus jienastanbáikái.

– Lea váttis dán jagi jienastit. Ollislaččat ferte geahččat dan politihka man bellodagat ovddidit ja makkár olbmot leat listtuin. Lea nu olu maid ferte árvvoštallat ovdal go jienasta. Mu mielas lea hui váttis dán jagi mearridit makkár bellodaga galgá jienastit, muhto in čiegat ahte attán iežan jiena borgárbellodahkii. Dađi eanet in muital, earret go dan ahte áiggun iežan jienastanvuoigatvuođa geavahit, dadjá Davidsen.

 

-Almmuhus-