Luossadronnet Eeva Nuorgam vuittii Ávvira mannan vahkku gilvvu go gottii hirbmat luosa oagguntuvrras skihpáriin.
Luossadronnet Eeva Nuorgam vuittii Ávvira mannan vahkku gilvvu go gottii hirbmat luosa oagguntuvrras skihpáriin.
– Áibbas somá ja lean hui ilus. Šadden gal buorre millii. Ammal moai guktot ožžo gonagas- ja dronnetgaibagahpira go leimme ovttas oaggumin, jearrá movttegis Eeva Nuorgam.
Juohke vahkku šaddá son gii sádde sisa gova dan stuorámus luosas, luossadronnet dahje gonagas, dán vuoro sádde Ávvir luossadronnet ja luossagonagas gaibagahpira Eevai ja su oaggunskihpárii Juuso Lukkarini.
Luossa maid Eeva gottii dolgevuokkain vuosttaš vahkku luossagilvvus, dettii jáhkkemeahttun 22,3 kilo, ja lea okta daid stuorámus luosain mii lei goddon stákkus Deanu čázádagas dán geasi.
Ii oktage nagodan ge lahkonit dán sturrodaga mannan vahkku gilvvus, ja nu lei ahte Eeva šattai luossadronnet.
Eeva ii lean goassige goddán ná stuorra luosa, ja sus doarggistedje vel juolggit go fuomášii man stuoris lei dát luossa mii dohppii su vuggii.
– Lei hui issoras ja speanta. Go vuosttas geardde oidnen dan luosa, de mus juolggit doarggistišgohte go lei nu stuoris. Diimmu ja 15 minuhta váibadeimme dan ovdalgo rohttiime dan fatnasii, čilge Eeva.
Ávvira guollegilvu
Ávviris lea dán geasi maid guollegilvu. Jus searvvat Ávvira luossagilvui luosain máid goddát muhtun jogas, de sáhttát šaddat luossagonagassan dahje -dronnegin. Mánát sáhttet maid searvat.
Ollesolbmuid luohká váldovuoitu lea 5000 ruvnno árvosaš skeaŋkakoarta, mánáidluohkás ges 1500 ruvnno árvosaš skeaŋkakoarta. Mánáid gaskkas vuorbáduvvo maid oaggunstággu vahkkosaččat.
Dán rádjái eai leat eará go guovttis oassálastán luossagilvui, ja danin lea oalle stuorra vejolašvuohta vuoitit 5000 ruvnno.
Suhkamin Ohcejogasa
Eeva lei suhkamin oaggunskihpáriin Juuso Lukkariin Luosguoikkas,
– Moai leimme guokte luosa jo goddán ja diibmu álggii lahkonit 19.00 suoma áiggi, dalle vahku ráfáidahttin álgá, muhto justa ovdal dan dohppii. Mun gessen eará vuokkaid bajás ja válden dan stákku gihtii mas luossa lei gitta, čilge son.
Ii lean luosjuolgi
– Mun vel lohken iežan oaggunskihpárii ahte dat gal lea dušše luosjuolgi, go láhttii álggos seamma láhkai go dat unnit luossa man leimme aiddo ožžon jo fatnasii, muhto dalle rulla bárgugođii ja luossa vuodjalii bajás guvlui. Dalle moai gal fuobmáime ahte ii leat luosjuolgi, máinnasta Eeva.
Son muitala dán leat stuorámus luossan man goassige lea goddán:
– In leat goassige goddán ná stuorra luosa ovdal! Ferten gal ieš borrat dan stuorra guoli vai lihkku in masse, čaibmá Eeva go jearan maid luosain áigu.
Soai gottiiga golbma luosa dán oagguntuvrras, unnimus lei 3,5 kilo ja nubbin stuorámus lei 12 kilo. Eeva muitala son áinnas áigu eambbo bivdit dán geasi.
