-Almmuhus-
-Almmuhus-
OĐĐASAT Eatnasat eai geavat šelggona

Eatnasat eai geavat šelggona

-

-

Vaikke šelggongeavaheapmi lassána, de leat áin dušše njealjis logi olbmos geat geavahit šelggona.

Šelggongeavaheapmi lassána veaháš Norggas, dan čájeha Trygg Trafikk jahkásaš šelggonlohkan. Jagis lassánii ovttain proseanttain, 39 proseantta 2016:s, ja 40 proseantta 2017:s.

Muhto vaikke lea lassáneapmi jagis jahkái, de leat áin olusat geat eai geavat šelggona, guđas logi olbmos.

– Maŋemuš jagiid lea veaháš lassánan, muhto go dušše njeallje olbmo logi olbmos geavahit šelggona, de čájeha ahte mis lea áin olu bargu, lohká Trygg Trafikk gulahallanhoavda Ann-Kathrin Årøen.

 

Riikkaviidosaš lohkan

Trygg Trafikk lohká juohke jagi šelggoniid. Sii mannet juohke fylkii, ja lohket šelggoniid. Diibmá ledje oktiibuot 24 000 lohkama. Kártema lea Ipsos MM fitnodat veahkkin bargan.

– Go seavdnjadin ii geavat šelggona, de lea juo válljeme leahkit oaidnitmeahttun seavdnjadasas, biilajohtolagas. Šelggon lea áidna vuohki movt oidnot seavdnjadasas, lohká son.

 

Gávpogiin unnimus

Gávpotgáhtain leat unnán šelggonat, dušše 33 proseantta geavahit šelggona gávpogis, muhto 47 proseantta geavahit dan muđui geainnu alde. Trygg Trafikk jáhkká olbmot doivot ahte eai dárbbaš go leat gáhttačuovggas.

– Maiddái gávpogis dárbbaša šelggona. Rámbuvračuovggat ja eará biillat váldet buot fuomášumi, ja vázzi olmmoš ii báljo oidno šelggona haga, čilge Årøen.

- Advertisement -
-Almmuhus-