– Eat sáhte šat dohkkehit ahte mánát ja nuorat ballet skuvlii vuolgimis

– Menddo olusiin billašuvvo skuvlavázzin givssideami geažil, eat ge mii sáhte dohkkehit ahte mánát ja nuorat juohke beaivvi ballet vuolgimis skuvlii, čállá Håkon Garvo guhte lea nuoraidevttohas Finnmárkku Risttalaš Álbmotbellodagas lohkkiidreivves.

Vásihit ahte eai vuhtiiváldo

Mannan dálvvi čađahuvvo máŋggat spáiddarvázzima Norggas givssideami vuostá, maiddái Finnmárkkus. Risttalaš Álbmotbellodaga nuorat oaivvildit skuvllaid galgat leat oadjebas sadjin gos buot mánát ja nuorat galget beassat vásihit árgabeaivvi givssideami haga, danne oaivvildit dárbbašuvvot muhtima mii lea váhnemiid ja ohppiid doarjjan givssideami eastadeamis.

– Mii Finnmárkku RÁBas áŋgiruššat oččodit givssidanáittardeaddji Finnmárkku Fylkii mii galgá veahkehit váhnemiid, ohppiid ja skuvllaid givssidaneastadeamis. Maŋimuš áiggiid leat gullan vásáhusaid olbmuin geat leat givssiduvvon. Dávjá muitaluvvo ahte sii vásihit ahte sin ii gula okta ge, eai ge váldo duođas, čállá Garvo.

Sihke ohppiide, váhnemiidda ja oahpaheddjiide ávkin

Garvo čállá ahte lea dehálaš oččodit givssidanáittardeaddji vai givssideapmi, mii dáhpáhuvvo Finnmárkku skuvllain, unnošii. Son oaivvilda givssidanáittardeaddji sáhttit nannet eastadanbargguid mat jo leat doaimmas fylkkas.

– Finnmárku dárbbaša givssidanáittardeaddji, dakkára masa oahppit sáhttet dorvvastit jus váttisvuohta ii čovdo eaŋkilskuvllain. Dakkára masa váhnemat sáhttet dorvvastit jus skuvllat eai vuhtiiváldde sin. Dakkára mas oahpaheaddjit sáhttet oažžut veahki bargat váttes givssidanáššiiguin, oaivvilda Garvo ja čállá ahte dehálaš bargun dákkár áittardeaddjis, livččii čuovvolit fylkka skuvllaid ja ovttasbargat buriid báikkálaš givssidaneastadan ortnegiiguin.

Finnmárkku Risttalaš Álbmotbellodat háliida buot ohppiide oadjebas ja buori skuvlaárgabeaivvi.

– Mii sávvat ahte Finnmárku livččii máilmmi buoremus bajásšaddanbáiki, danne fertet garraseappot bargat givssideami vuostá, loahpaha nuoraidevttohas.