Longyearbyenis fárrehit dál olbmuid garra dálkki dihte. Jovnna Zakharias Dunfjell guhte ássá Svalbárddas, lohká ipmirdit mearrádusa, muhto son ii jierásnuva gal.
Longyearbyenis fárrehit dál olbmuid garra dálkki dihte. Jovnna Zakharias Dunfjell guhte ássá Svalbárddas, lohká ipmirdit mearrádusa, muhto son ii jierásnuva gal.
Svalbárdda áššeolmmái lea fárreheame eret olbmuid geat orrot Nybyen báikkis Longyearbyenis.
Garra biegga lea dieđihuvvon ollet Svalbárdii odne eahket, ja áššeolmmái fárreha olbmuid eret vai ii dáhpáhuva seamma ládje go jagi áigi dáhpáhuvai Sukkertoppen lahka.
Dalle fierai muohtauđas ja mollii máŋga viesu, ja okta olmmoš duššai.
Áššeolmmái ii áiggo fárrehit olbmuid geat orrot Sukkertoppen lahka vuos.
– Mearrádusat leat dahkkon dan vuođul go mis leat NVE fágačeahpit geat gozihit uđasvára. Mii čuovvut mielde dálkedieđáhusas ja gulahallat NVE:in, dieđiha áššeolmmái Kjerstin Askholt neahttasiiddus.
Eai doala plánejuvvon juovlafeastta odne
Jovnna Zakharias Dunfjell, gii orru Svalbárddas ja bargá Longyearbyena girkus, lohká ipmirdit áššeolbmá mearrádusa.
Sii eai hálit vásihit dakkár dili go vásihedje diibmá ovdalaš juovlabasiid.
– Mis galggai odne leat juovlafeasta girkus, muhto mii leat šluhtten feasta, muitala Dunfjell, gii ii jierásnuva dálkkiin.
Girku ii galgga leat lahkosis das gos ballet uđđasa fierrat, muhto áššeolmmái ávžžuha olbmuid orrut siste, ii ge mannat olggos odne.
– Dáppe ii leat nu beare ollu muohta, muhto biegga sáhttá sirdit muohttaga jođánit, ja dagahit uđđasa, muitala Dunfjell.
Ođđa čoahkkin NVE:in
– Diibmu 14:00 gaskavahkku galgá fas ođđa čoahkkin NVE:in, ja mii soaitit de dahkat ođđa mearrádusaid go oažžu eanet dieđuid, lohká áššeolmmái Askholt.
Meteorologalaš Instituhtta lea dieđihan stoarpma, ja biegga sáhttá bosádit 25 m/s gaskavahkku maŋŋelgaskabeaivvi rájes ja doalada biekka olles ija.
Uđasvárra lea stuoris, ja áššeolmmái ávžžuha olbmuid čuovvut dieđuid maid sii addet neahttasiiddu bokte dađistaga.
