-Almmuhus-
-Almmuhus-
-Almmuhus-
OĐĐASAT– Eat dieđe vuos leago min sivva

– Eat dieđe vuos leago min sivva

-

-

HV17 hoavda ii loga vuos diehtit leago Suodjalus mii lea mollen bevddiid bisánanbáikkis Máze olggobealde.

– Dalle go mun serven Altapostena jearahallamii de eat lean ožžon vuos dieđu dán birra, ja eat leat gal dál ge vuos ožžon dieđu eará go media bokte, čilge Suodjalusa HV17 hoavda Ståle Grytli.

 

Eai dieđe geasa galget buhtadit

Ávvir čálii eske Gobba-Suolojárgátti bisánanbáikki birra, gos beavddit ja stuolut leat mollejuvvon. Áššis logai Stáhta Geaidnodoaimmahaga gulahallanráđđeaddi Thomas Rolland ahte sii leat bargamin áššiin ja gulahallamin Suodjalusain.

Altaposten báberáviisa čálii álggus dán ášši birra, dan áššis logai HV17 hoavda Ståle Grytli iežaset áigut buhtadit vahágiid.

Ávvirii dadjá Grytli dál ahte jus sii galget buhtadit vahágiid de fertejit vuos diehtit geasa galget buhtadit.

– Go oažžut vahátdieđu de buohtastahttit vahága iežamet dieđuiguin, jus čájehuvvo ahte mis leat soalddáhat leamaš dan báikkis de diehttelasat buhtadat vahágiid, čilge son ja čujuha iežaset Vahát- ja birasoffiserii Kjetil Hanssenii guhte bargá dáinna áššiin.

 

Áigu fitnat geahččamin

Kjetil Hanssen duođašta iežas bargamin áššiin.

– Dán áššis leat ieža šaddan ohcagoahtit bisánanbáikki eaiggáda. Mun lean váldán oktavuođa Stáhta Geaidnodoaimmahagain gulaskuddan dihte gullá go bisánanbáiki sidjiide. Go sii vástidit de beasan fitnat geahččamin báikki ja oaidnit lea go Suodjalus mollen daid bevddiid ja stuoluid, čilge son ja muitala iežas vuordimin duođaštusa geaidnodoaimmahagas.

 

 

-Almmuhus-