Politiijat eai loga diehtit gii eaiggáduššá bartta mii mannan ija bulii lulábeale Máze.
Politiijat eai loga diehtit gii eaiggáduššá bartta mii mannan ija bulii lulábeale Máze.
– Mii eat dieđe gii eaiggáda bartta, eai ge buollinčáskadandoaimmahagas ge leat dát dieđut, dadjá Oarje-Finnmárkku politiijaguovllu operašunjođiheaddji Asgeir Aule.
Bulii gutnan
Aule muitala politiijaid dál leat dutkamin Máze lagasbirrasis, gulaskuddan dihte leat go olbmuiguin dieđut bartta birra. Politiijat ožžo dieđu buollima birra diibmu 23.50 mannan ija, barta mii bulii gutnan lei Goldinvuohppis sullii miilla lulábealde Máze.
– Jáhkkimis váldá eaiggát oktavuođa minguin go de gullá ahte barta lea buollán, dadjá Aule.
Eai dieđe buollinsiva
Operašunjođiheaddji ii loga politiijaid vuos diehtit mo barta lea buollán.
– Mii fertet vuordit dassái go buollinsadji čoasku, vai sáhttit iskat eanet. Dán rádjai ii leat mihkkege mii čujuha ahte bartta leat cahkkehan, muhto ii leat dan dihte mihkkege mii čujuha ahte ii leat cahkkehuvvon ieš dáhtos. Mii fertet njulgestaga eanet dutkat ovdal go sáhttid dadjat dán birra maidege.
Son muitala buollinčáskadandoaimmahaga dieđihan sidjiide buollima birra.