-Almmuhus-
-Almmuhus-
OĐĐASATDát nuorat eai báljo guldal NRK Sámi 

Dát nuorat eai báljo guldal NRK Sámi 

-

-

Nuorat geaiguin Ávvir lea hupman eai báljo guldal NRK Sámi sáddagiid vaikko nuoraid váste ráhkadit rádiosáddagiid.

Maŋŋel go Ávvir čálii ášši NRK Sámi guldaleddjiid loguid birra, de leat oallugat reageren sosiála mediain. Danne mearridii Ávvir jearahallat olbmuid iežaset rádioguldaleami birra ja gullat sihke nuorain, geaid NRK Sámi rádiosáddagat galggaše deaivat, ja maid olbmuid geat eai leat NRK Sámi mihttojoavkkus. 

Go Ávvir humai NRK Sámi almmuhandirektevrrain Pål Hivandain, de Hivand dajai ahte sii leat válljen dahkat muhtin rievdadusaid rádiosáddenskovis go sis lei sávaldat deaivat nuorra guldaleddjiid.

Ávvir lea váldán oktavuođa muhtin nuoraiguin ja dat golmmas geat vásitidedje dadjet ahte sii guldalit unnán NRK Sámi sáddagiid. 

Sosiála mediat fuomášuhttet

Kárášjoga nieida May Irene Anti lea okta geainna Ávvir lea humadan. Son muitala iežas hui unnán guldalit NRK Sámi rádiosáddagiid, muhto jus sosiála mediain oaidná áššiid mat geasuhit, de son guldala. 

– In láve gal guldalit NRK Sámi sáddagiid, earret go jus biillas deaivá NRK Sámi sátta alde go vuoján. Mun láven Facebookas ja Instagrammas oaidnit sin rádiodoaimmaid, dadjá Anti.

Son ii loga guldalit NRK Sámi go ii jurddaš guldalit sáddagiid. 

– Dat maid lean gullan lea gal buorre ja muhtun ráje miellagiddevaš, dadjá son. 

Guldala go orru miellagiddevaš

Guovdageainnu nieida Isabel N. Kemi muitala iežas guldalit NRK Sámi sáddagiid dalle go sáddagat orrot miellagiddevaččat. 

– Dat lea gal oalle hárve, dadjá son.

Kemi ii loga guldalit doarvái ahte diehtá lea go duhtavaš ja leat go doarvái ođđasat ja servodatdigaštallamat.  

– Áššit maid lean guldalan leat leamaš buorit, dadjá son. 

Molssaeaktu Spotifyi

Nubbi nuorra Guovdageainnu nieida, Monika Holmen Hætta, lohká iežas guldalit NRK Sámi sáddagiid go vuodjá biillain ja earenoamážit go vuolgá Álttás ruoktot Guovdageidnui. 

– Láve somá guldalit go hupmet rádios, ii ge dušše Spotifys guldalit musihka. Mun in guldal NRK Sámi sáddagiid beaivválaččat, muhto bearjadagaid, go gearggan skuvllas ja vuoján Álttás Guovdageidnui.

Holmen Hætta mielas leat doarvái ođđasat ja servodatdigaštallamat, muhto dattetge ii leat áibbas duhtavaš sáddagiiguin.

– Muhtumin sáhttá leat oalle láittas, ja muhtumin ges lea beare ollu moivi, dadjá son. 

-Almmuhus-