2,8 miljovnna buoridan dihte psyhkalaš dearvvašvuođa studeanttain Romssas ja Finnmárkkus.
Vaikko eanas studeanttat loktet, de lea áiggi mielde lassánan dat lohku geat muitalit ahte rahčet psyhkalaččat.
Ráđđehus áigu danne nannet dán jagi studeanttaid psyhkalaš dearvvašvuođa áŋgiruššama.
Dál lea čielgan geaidda juolluduvvo doarjja bargui buoridan dihte psyhkalaš dearvvašvuođa ja eastadit studeanttaid gárrenmirkováttisvuođaid.
– Álgoálggus galggaše studeanttat, geat rahčet psyhkalaš dearvvašvuođain dahje leat gárrenmirkováttisvuođat, oažžut dan veahki man dárbbašit gielddadearvvašvuođabálvalusas, muhto mii áigut veahkehit vai šattaše iešguđetlágan fálaldagat oahppobáikkiide vel lassin. Danne háliideimmet maid nannet studeanttaid psyhkalaš dearvvašvuođa eastadeami lassi 10 miljovnnain. Dál lea juogadeapmi gárvvis, ja 19 studeantaovttastusa ja institušuvnna juogadit oktiibuot 18,4 miljovnna ruvnno, dadjá dutkii- ja alitoahppoministtar Iselin Nybø preassadieđáhusas.
Ráđđehusa áŋgiruššansuorgi
Dearvvašvuođadirektoráhtta hálddaša doarjjaortnega ja árvvoštallá ohcamušaid.
Studeantaovttastusat, universitehtat, allaskuvllat dahje studeantaorganisašuvnnat geat ovttasbarget ovttastusaiguin, sáhttet ohcat doarjaga mii sáhttá geavahuvvot eastadeaddji doaimmain, iešguđetlágan bálvalusfálaldagain ja prošeavttain mat veahkehit loktet studeantta dearvvašvuođa ja loaktima oahpu.
– Psyhkalaš dearvvašvuohta lea ráđđehusa áŋgiruššansuorgi, mii boahtá studeanttaide maid buorrin. 2020 rájes boahtá ovdamearkka dihte gáibádus ahte buot suohkaniin galgá psykologamáhttu. Ráđđehus lea heivehan nu ahte buot suohkaniidda galgá juolluduvvot doarjja rekrutteret psykologaid, dadjá dearvvašvuođaministtar Bent Høie preassadieđáhusas.
