Koronavirusa njoammuneastadeami dihtii lágidit buot gielddat Norggas vuođđoláhkabeaivvi, miessemánu 17. beaivvi, eará láhkai go dábálaččat, maiddái davvin.
Miessemánu 17. beaivvi lágidanlávdegottit muitalit dán jagi šaddat earálágan miessemánu 17. beaivvi doaluid. Buot gielddat muitalit ahte sii sáddejit live-sáddagiid doaluid birra ja olbmot fertejit ieža ávvudit beaivvi mo háliidit. Norgga ráđđehus mearrida miessemánu čihččet beaivvi čoahkkanannjuolggadusaid ja dan ledje olu gielddat vuordimin.
Ii šatta ráidovázzin
Kárášjoga gieldda kulturkonsuleanta Ann Kristin Holmestrand muitala ahte eai šatta dábálaš miessemánu 17. beaivvi lágideamit Kárášjogas. Dán jagi sádde gielda doaluid gieldda ruovttusiiddus ja Facebookas.
– Musihkkakorpsa čuojaha olggobealde kirku, das maŋŋá biddjo rássebonus muitobácci máddagii ja dalle čuojaha maid korpsa, ja maiddái olggobealde dearvvašvuođaguovddáža, nu mo lávejit. Gieldda live-sáddagis sáhttá gullat sátnejođiheaddji Svein-Atle Somby beaivvisártni ja Sámi joatkkaskuvlla russapresideantta Ine Amalie Gaup sártni, čilge Kárášjoga gieldda kulturkonsuleanta Ann Kristin Holmestrand.
Gielda ii leat vuos mearridan sáddejit go ipmilbálvalusa Kárášjoga kirkus.
Porsáŋgu lágida doaluid Bánáha girdinšilljui
Porsáŋggu gieldda miessemánu 17. beaivvi lágideami fuolaha Porsáŋggu valáštallansearvi PIL spábbačiekčanjoavkku jođiheaddji Tove Amundsen. Lohká ahte váttisvuohta dán jagi lea oažžut doarvái olbmuid veahkkin vai sáhttet lágidit juoidá.
– Leat jurddašan ahte sáhtášii vuodjit biilaráidduin Leavnnja márkanis Bánáha girdišilljui gokko girdit bisánit ja gosa čáhket 200 biilla. Doppe doallá sátnejođiheaddji Aina Borch beaivvi sártni girdiboardaga bajimus bátneceahkis. Olbmot sáhttet gullat su sártni biillas, Radio Nordkapp sáddaga bokte. Das galgá leat drive-in-kino gos čájehat stuorrašearpmas, jáhkkimis Disney mánáidfilmma «Biler», muitala Tove Amundsen, gii lea miessemánu 17. beaivvi lágidanlávdegotti jođiheaddji.
Amundsen muitala ahte lea drive-in-ipmilbálvalus mii maid streamejuvvo, Leavnnja kirku biilaguođđinsajis. Porsáŋggu gieldda ruovttusiiddus gávdná eambbo dieđut. Tove Amundsen lohká dál leat hui olu vuostálas dieđuid servodagas, nu ahte son ii dieđe man stuorra beroštupmi lea ávvudit Norgga vuođđoláhkabeaivvi, miessemánu 17. beavvi.
Unjárggas hutket eará
Unjárgga gielddas lea golmma jagi šiehtadus valáštallanservviin ILAR:in lágidit Norgga vuođđoláhkabeaivvi ja lágidanlávdegotti jođiheaddjit leaba Marit Kjerstad ja Elisabeth Reisænen. Dál lea nubbi jahki.
– Šaddá leavgageassin, rássebonus bidjan muitobácci máddagii, Facebookas biddjo beaivvi sárdni ja tiibmu 13.00 lávlu olles Norga nationálalávlaga «Ja vi elsker». Eat mii leat guhkibui joavdan plánenbarggus. Mis ii galgga leat biilavuodjinráidu. Lávdegoddi hutká juoidá, lohká Elisabeth Reisænen.
Dieđuid miessemánu 17. beaivvi doaluid birra gávdná Unjárgga gielddasiiddus ja maiddái Facebookas ja ILAR siiddus. Soai sávvaba olbmot ožžot fiinna miessemánu 17. beaivvi.
Biilaráidu Deanušalddis Skiipagurrii
– Mii ávvudat miessemánu 17. beaivvi Deanus, muhto dat dáhpáhuvvá eanaš interneahta live-sáddaga bokte. Go eat sáhte ráidun vázzit, de lágidat mii biilaráidovuodjima Deanušalddis gitta Skiipagurrii, čilge Deanu sátnejođiheaddji Helga Pedersen.
Deanu gieldda Facebook-siidui lea gielda bidjan beaivvi prográmma. Live-sátta álgá tiibmu 10.45, dasto lea ipmilbálvalus ja tiibmu 12 doallá sátnejođiheaddji beaivvi sártni. Birrasii tiibmu 13.20 vuolgá biilaráidu johtui Skiipagurrii. Korpsa čuojaha ja live-sátta bistá gitta birrasii bealgolmma rádjái.
Ávžžuha giláža olbmuid ieža vázzit 17. beaivvi ráiddus
Gáivuona suohkana sátnejođiheaddji Bernt Eirik Isaksen Lyngstad lohká gieldda juohkit dieđuid miessemánu 17. beaivvi birra gieldda ruovttusiiddus.
– Mii leat jurddašan ahte olbmot sáhtášedje sáddet oanehisfilmmaid mo sii ávvudit beaivvi, gielddasiidui oktan #- mearkkain sihke Facebookii ja Instagramii. Mii jurddašeimmet juohkit vuoittu iešguđet fáttás. Maiddái mu beaivvi sárdni gávdno doppe. Ávžžuhan muđui iešguđet gilážiid olbmuid vuollel 50 olbmo ráidun vázzit ráđđehusa rávvagiid ektui, lohká Gáivuona suohkana Bernt Eirik Isaksen Lyngstad.
Lagasrádio sádde sátnejođiheaddji beaivvi sártni ja ipmilbálvalusa
Guovdageainnu suohkana sátnejođiheaddji Hans Isak Olsen čilge ahte ovddit jagiid leat Guovdageainnu suohkana skuvlaluohkát ožžon veaháš ruđaid suohkanis lágidit dán ávvubeaivvi.
– Dat ii šatta dán jagi gal. Lea dábálaš leavgageassin. Sátnejođiheaddji doallá beaivvi sártni Guovdageainnu Lagasrádios. Girku sádde ipmilbálvalusa lagasrádios nu mo dábálaččat. Muđui eai šatta makkárge doalut. Mun jáhkán olbmot ipmirdit hui bures manne ii šatta mihkkege dán jagi. Mii eat leat plánen biilaráiddu, muhto jus olbmot háliidit dan dahkat, de eai leat makkárge gildosat biillain vuodjit márkanis, čilge Guovdageainnu suohkana sátnejođiheaddji Hans Isak Olsen.
