Dál oažžu vejolašvuođa girku neahttasiiddus dieđihit iežas eret girku miellahttologus. Eará oskkuide lassána doarjja jus olbmot celket iežaset eret girkus.
Dál oažžu vejolašvuođa girku neahttasiiddus dieđihit iežas eret girku miellahttologus. Eará oskkuide lassána doarjja jus olbmot celket iežaset eret girkus.
Norgga girku miellahtut ožžot dál ieža doaimmahit miellahttovuođa elektrovnnalaččat. Ovdal fertii juohkehaš ieš váldit oktavuođa báikkálaš searvegoddekantuvrrain go áiggui iežas cealkit eret girkus, čállá NTB.
– Girku dárbbaša álkis ja buriid ortnegiid vai miellahttolohku lea riekta, go leat 3,8 miljovnna miellahtu. Girkoráđđi lea dan dihte heivehan nu ahte juohkehaš galgá sáhttit ieš divvut boasttuvuođaid miellahttoregistaris. Sisa beassá bank-ID:in ja eará elektrovnnalaš identifikašuvnnain, muitala Girkoráđi direktevra Jens-Petter Johnsen.
Ollugat dieđihuvvojit riegádeamis automáhtalaččat girkui miellahttun go juobbá váhnemiin lea miellahttu. Maŋemus logi jagi lea girku massán 140 000 miellahtu, vaikko olmmošlohku lea lassánan, čállá Side3 neahttasiidu.
Lassána eará oskkuide go girkus unnu miellahttolohku
Jus cealkkát iežat eret girkologus, de ožžot seammás eará oskkut eanet ruhtadoarjaga stádas, vaikko it dieđit iežat eará oskkuide.
Sivvan lea dat go girku oažžu fásta doarjaga mii lea 1 826 206 000 ruvnno 3 872 490 miellahtu ovddas. Go juohká dan supmi, de šaddá 472 ruvnno juohke miellahtu nammii. Girku oažžu vel suohkaniin sullásaš ruhtadoarjaga, nu ahte doarjjasupmi šaddá birrasii 900 ruvnno juohke miellahtu ovdii.
Girku oažžu seamma doarjjasupmi vaikko miellahttolohku njiedjá, nu ahte girkui ii váikkut iešalddis go muhtimat celket eret girkologus.
Váikkuhus lea ahte eará oskkuide lassána ruhtadoarjja, ja doarjja lea ollu lassánan maŋemus jagiid. Sivvan dasa lea go olbmot celket eret girkologuin, de lassána supmi juohke miellahtu namas geat ain leat girkus mielde. Eará oskkut Norggas galget oažžut seamma supmi juohke miellahtu ovddas go girku oažžu. Dalle lassána doarjjasupmi eará oskkuide.
Ollu aktivitehta leamaš neahttasiiddus
Norgga girku diehtojuohkindirektevra Ingeborg Dybvig muitala ahte sii eai dieđe vel sihkkarit gallis leat dieđihan iežaset eret girkologus dál go olbmot ieža besset dan bargat neahta bokte.
– Lea hui ollu aktivitehta leamašan min neahttasiidduin, nu go vurddiimet. Mii doaivut ahte ollugat leat iskame iežaset birra, ja sihkkarit ollugat geat leat fitnan rievdadusaid dahkame. Mis eai leat makkárge dieđut dan birra, muhto jáhkkit ahte ollugat leat dieđihan iežaset eret girkologus, muitala son Side3 neahttasiidui.
