Eanodaga girdingieddái seivot dán dálvvi eanet girdit go goassege ovdal, lagabui čuođi chartergirdi.
Eanodaga girdinšilju doaibmajođiheaddji Marko Halla dadjá Yle Sápmái ahte son doaivu boahtit badjel 30 000 turistta dán dálveáigodaga Eanodahkii, mii lea ođđa olahus.
– Eanemus turisttat bohtet Stuorra-Británnias, muhto maiddái Gaska-Eurohpás ja Irlánddas. Mun oainnán, ahte luondduturisma lea dál hui bivnnut. Dat vuhtto maid dáppe Eanodagas. Turistaáigodat bistá juovlamánus guovvamánu lohppii, dadjá Halla.
Business Lapland statistihka mielde 2019:s Lappis ledje 3,1 miljovnna idjadeami. Stuorra oassi olgoriikka mátkkálaččain ledje kiinnálaččat. Maiddái olu turisttat bohte Eurohpás, Mátta-Ásias, USA:s ja Austrálias.
