Mannan vahku leat divvon Eanodaga girdinšilju, dieđiha Yle Sápmi. Dál sáhttet stuorit girdit maid seaivut Eanodahkii.
Giđđat stáhta eaiggádan Finavia dieđihii ahte sii háliidedje heaittihit Eanodaga girdišilju. Muhto Eanodaga gielddapolitihkkárat eai dohkkehan dan. Dál lea Eanodaga gielda váldán girdinšilju iežaset háldui ja hálddašit dál jođiheami ja divvuma. Suoidnemánus dat Eanodaga gielda ja Finavia vuolláičálle soahpamuša. Dat lei Finavia okta eaktu dasa, ahte girdindoaibma boahtte dálvvi joatkašuvvá.
Eanodaga girdinšiljus lea dál ođđa asfálta ja Eanodaga váldostivrra ságadoalli Seppo Alatörmänen lohká Yle Sápmái ahte dat lea buorre gieldda mátkeealáhussii:
– Gielda lea sorjavaš mátkeealáhussii ja girdingietti bokte fitnodagat dinejit, čilgii son.
Suoma riikkabeaivvit mieđihii stáhta lassibušeahtas vihtta miljovnna euro Eanodaga girdinšilju divvumii.
