Finnmárkku politiijaguovllus váidojuvvo 132 olbmo promillavuodjima dihtii vuosttaš jahkebealis– dat lea 13 proseanta lassáneapmi buohtastahttojuvvon seamma áigodagain diibmá.
MA – Gárrenkeahtes Johtolat, organisašuvdna mii bargá dan guvlui ahte ii oktage galgga massit heakka gárrenvuodjima dihtii, vuorjašuvvu geassejohtolaga ovddas.
– Johtolatdilálašvuohta geasset lea juoga mii vuorjá. Mii galgat muitit ahte 26 proseanta buot jápminlihkohisvuođain johtolagas dáhpáhuvvet gárrenvuodjima dihtii. Don deaivvat hui sihkkarit vuoddji gárrendilis dán geasi, dadjá generálačálli organisašuvnnas, Elisabeth Fjellvang Kristoffersen.
Generálačálli dieđiha maid ahte geassi lea dat áigodat goas eanemus olbmot masset heakka johtolagas. Dain 93 geat dušše geainnuid alde, jápme 27 dain geassemánuin.
