-Almmuhus-
-Almmuhus-
OĐĐASAT Eanet oahppit heitet fidno­fágain

Eanet oahppit heitet fidno­fágain

-

-

6435 oahppi joatkkaskuvllas heite gaskan ovddit skuvlajagi.

Leat eanet oahppit geat heitet fidnofágain go oahppospesialiseremis.

– Váikkuha garraset go heaitá joatkkaskuvllas, ii dušše oahppái, muhto maiddái servodahkii. Logut čájehit ahte mii dárbbahit buoret čuovvoleami ohppiin vai nagodit veahkehit ohppiid ceavzit oahpu, dadjá oahppo- ja integrerenministtar Jan Tore Sanner (O) preassadieđáhusas. 

Oahppodirektoráhta ođđa logut čájehit ahte 3,4 proseantta ohppiin heite gaskal golggotmánu vuosttaš beaivvi ja skuvlajagi loahpa, eai ge álgán eará oahpposuorgái. Oahppit geat molsot skuvlla dahje suorggi eai leat mielde dain loguin.

– Ráđđehus áigu addit fylkkasuohkaniidda eanet ollislaš ja čielga ovddasvástádusa čuovvulit ohppiid ja sin geat leat gaskal 16- ja 24-jahkásaččat. Sii fertejit oažžut veahki beassat ruovttoluotta ja oažžut vejolašvuođa váldit oahpu. Min mihttu lea ahte eanet oahppit cevzet, muitala Sanner preassadieđáhusas. Oslos leat badjel gávcci proseantta geat heitet fidnofágain, ja dat lea eanemus riikkadásis. Finnmárkkus leat eanemusat geat heitet oahppospesialiseremis. Riikkadásis leat guhtta proseantta geat heitet fidnofágas, ja guokte proseantta oahppospesialiseremis.

Preassadieđáhusas maid čállet ahte boahtte čavčča galgá fidnofága šaddat praktihkalaččabun, ja eanet spesialiserejuvvon.

– Dat lea dat stuorámus rievdadus fidnofágaide Máhttoloktema rájes mii lei 2006:s, loahpaha Sanner preassadieđáhusas.

-Almmuhus-