Eanet mánát vásihit olggušteapmi, givssideami ja loavkideami mánáidgárddis.
Mánáidgárddiid váhnenlávdegoddi (FUB) oaidná čielgasit ahte eanebut válde diibmá singuin oktavuođa mánáidgárdemánáid birra geat vásihit olggušteami, givssideami dahje loavkideami mánáidgárddis.
Bagadallanáššit maid čatnasit mánáidgárdemánáide lassánedje 223 áššis 2021:s 262 áššái 2022:s.
Goalmmádasoassi sis geat válde oktavuođa dahke dan go vásihedje ahte bargi lea loavkašuhttán máná mánáidgárddis. Dan čállá FUB preassadieđáhusas.
– Duogážin lassáneapmái sáhttá leat dat go láhka oadjebas ja buori mánáidgárdebirrasa birra bođii 2021:s. Váhnemat dovdet lága ja dihtet ahte sin mánáin lea riekti dorvvolaš ja buori dillái, lohká FUB jođiheaddji Einar Olav Larsen preassadieđáhusas.
Áššit mat gusket mánáide geat eai dovdda iežaset oadjebassan mánáidgárddis leat maid lassánan. 2021:s ledje 33 dakkár ášši ja 2022:s ledje ges 50 dakkár ášši. (©NTB)
