-Almmuhus-
-Almmuhus-
-Almmuhus-
KULTUVRA– Eanet fápmu buktá riidduid

– Eanet fápmu buktá riidduid

-

-

Ođđa girji muitala movt sámepolitihkka lea rievdan maŋemus 30 jagis.

Sámit Norggas eai sáhte politihkket iešheanalaččat Norgga systema haga. Seammás ii sáhte Norgga stivrejupmi heaittihit sámepolitihkalaš doaimma.

– Sámedikki ásaheapmi lea buktán stuora váikkuhusaid ja rievdadusaid maid eai nu ollugat dieđe, muitala professor Per Selle gii bargá Bergena universitehtas.

Selle lea okta redaktevrrain girjjis mii aitto lea almmuhuvvon. Girjji namma lea «Samepolitikkens utvikling», ja das leat čállon deháleamos oasit sámepolitihkalaš ovdáneamis maŋemus 30 jagis.

 


Girji almmuhuvvo odne mii sisttisdoallá deháleamos osiid sámepolitihkalaš ovdáneamis maŋemus 30 jagis

Eanet fápmu sápmelaččaide

Selle oaivvilda Sámedikki vuogádaga buktán eanet fámu sápmelaččaide. Fápmohálddašeapmi sáhttá ráhkadit riidduid báikkálaš- ja guovllupolitihkas. Sámedikkis lea riekti ákkastit vuostá jus doaimmaid áigot álggahit boazodoalloguovlluide, mii maid lea earret eará dagahan vuosttaldeami bieggamillohuksemiidda Fálesnuoris Finnmárkkus.

 

Gáibiduvvo nanu eamiálbmotpolitihkka

Girjjis lea maid čállon movt internašunála riekteovdáneapmi lea váikkuhan ja báidnán Norgga sámepolitihka. Norgga stádii lea dárbbašlaš čađahit politihka mii gokčá internašunála gáibádusaid.

– Sámepolitihkka lea eamiálbmotpolitihkka, ja sámepolitihkas lea internašunála lossa deaddu. Jus Norggas galgá oassi leat internašunála doaimmain, de ferte stáda čájehit ahte doaimmahit eamiálbmotpolitihka internašunála gáibádusaid ektui, lohká Selle UiB siiddus.

 

Ollu oasit girjjis

Muđui bohtet girjjis ovdan sámepolitihkalaš oasit nanu oktavuođaiguin báikkálaš, riikaviidosaš ja internašunála ovttasbargoguimmiiguin. Jearaldagat mat biddjojuvvojit leat maid; movt leat oktavuođat ovdánan? Movt leat oktavuođat Sámedikki ja servvodaga gaskkas ovdánan? Lea go politihkalaš ovddideapmi váikkuhan oktavuođaid sámiid ja earáid gaskkas? Mat leat deháleamos ovttaláganvuođat ja erohusat Norgga sámiid dilis daid eará riikkaid sámiid ektui; Ruoŧas, Suomas ja Ruoššas?

Girjji redaktevrrat leaba sosiálaantropologa Bjørn Bjerkli ja stádadiehtti Per Selle, ja leaba čoaggán osiid eará dutkiin geain lea duogáš stádadutkamis, sosiologiijas, sosiálaantropologiijas, mediadutkamis, historjjás ja gielladutkamis.

-Almmuhus-