Mátkefitnodat TUI dieđiha preassadieđáhusas ahte dán jagi eai tiŋgon norgalaččat áigemunil mátkki geasselupmui, nu ahte dál suoidnemánu álggus leat hirbmat olu olbmot tiŋgon alcceseaset mátkki lieggariikii.
Lea 34 proseantta eanet tiŋgomat go dábálaččat olles riikkas, muhto davvi-norgalaččain lea stuorámus mátkkoštanmokta.
– Eahpitkeahttá leat olusat massán doaivaga ahte boahtá fas báhkka geassi Norgii. Eanet olbmot go ovdal leat dál sihkkarastimin alcceseaset vejolašvuođa návddašit liegga geasi máddin. Dát guoská olles Norgii ja haddi mearrida gosa háliidit, lohká TUI diehtojuohkinovddasvástideaddji Nora Aspengren.
Giehtatelefuvnnain ohcet bargoáiggis
TUI statistihkka čájeha olusat ohcet hálbbes lupmomátkkiid birra jándora, sihke barggus, eahkedis, ja eanemusat ostet mátkki sotnabeaivvi. Čájehuvvo ahte giehtatelefuvnna ohcan TUI neahta bokte leat dál 60 proseantta.
Dál ohcet eanemusat sajiid mat leat báhcán, ja mas lea vuolgináigi guđa vahkku siste.
– Lea ain vejolaš gávdnat buori geasseluopmomátkkiid mis. Jus háliida eanemus beaivváža ruđaid ovddas, de rávven ahte ii mearrit vissis vuolginbeaivvi, dahje vissis báikki, lohká Aspengren.
Mátketiŋgojumit mealgat lassánan
Diimmá ektui lea mátkkošteddjiid lohku girdihámmaniin lassánan mealgat, erenoamážit Bulgariai ja Tyrkiai gos ii leat nu divrras.
Tromssa girdinhámmanis lea lassánan mátketiŋgojumit 192 proseanttain, Haugesunda gávpogis 86 proseanttain, Bådåddjo 81 proseanttain, Bergenis 74 proseanttain, Stavangeris 52 proseanttain, Troandimis 32 proseanttain ja Oslos 19 proseanttain.
