Sisagaikun, biilasuoládeapmi, biilabuollin, lobihis vuodjimat ja feastariejat devde politiijalogga mannan jándora.
Sisagaikun, biilasuoládeapmi, biilabuollin, lobihis vuodjimat ja feastariejat devde politiijalogga mannan jándora.
Gáivuonas leat politiijat duoguštan badjel 30-jahkásaš nissona vuodjinkoarta.
– Nisu balahuvvo vuodján gárrenoaivvis. Mii dutkat ášši, dieđihit Romssa politiijaguovllu politiijaloggas Twitteris.
Álttás maid lobihis vuodjin
Álttá politiijat ges bissehedje nuorra gándda mannan ija go vujii lobiheamet mopedain.
– Gánda lea váidon go vujii mopedain vaikke sus ii leat lohpi vuodjit dainna, dieđihit politiijat.
Biila suoláduvvon
Ikte suoláduvvui biila Álttás, politiijat bivdet olbmuid cavgilit jus leat oaidnán maidege.
– Biila suoláduvvui ikte iđđes diibmu 08.45. Dás lea sáhka alit Toyota Carinas, das leat šiltanummirat ZT 33469, čállet politiijat Twitteris.
Sisagaikun
Kaiskuru čuoiganrusttegis, Álttás leamaš sisagaikun dán vahkkoloahpa, maiddái dán áššis jerret politiijat olbmuin veahki.
– Čuoiganrusttega klubbaviesus ja suohkana bálvalusviesus leat cuvkon lásiid. Jus olbmuin leat cavgileamit áššis, de bivdit sin riŋget 02800, lohket Oarje-Finnmárkku politiijaguovllus.
Viessobuollin
Gaskaija áigge ožžo politiijat dieđu viessobuollima birra Sørvær nammasaš báikkis Ákŋoluovtta suohkanis.
– Viesus leat máŋga ásodaga, ja stuora oassi viesus lea billašuvvan buollima geažil. Mii eat jáhke ovttage olbmo leamaš ásodagas mii buollái, ránnját evakuerejuvvojedje, dieđihit politiijat.
Biilabuollin
Odne iđđes ges dieđihuvvui ahte muhtin biila vuodján bádjel luotta ja buollán Stuorviikas, Láhpi suohkanis.
Biilageaidnu lea giddejuvvon Ákšovuonatunealla bokte.
Sihke politiijat, ambulánsa ja buollinčaskadeaddjit manne báikái. Ii okta ge galgga hávváduvvon lihkohisvuođas.
Feastariejat
Finnmárkku stuorámus gávpogiin leamaš veahá feastariejat.
Girkonjárggas leat gártan máŋga feastta bissehit mannan ija go ránnját leat bihkon rieja.
Politiijat ožžo maid dieđu doarrumiid birra Ofelaš olgobáikki olggobealde. Politiijat dihtet geat leat seaguhuvvon doarrumiidda.
Bidjon eret gávpotguovddážis
Hámmárfeasta politiijat gohččo badjel 20-jahkásaš albmá guođđit gávpotguovddáža maŋŋel go áittii boradanbáikki bargiid mannan ija, dievdu oaivvildii ahte ii lean ožžon iežas borramuša.
Muhtin eará almmái ges ii vuollánan máksit droššemátki ovddas Hámmárfeasttas, badjel 40-jahkásaš váido politiijaide.
Álttá politiijaid luhtte ges šattai nuorra dievdu idjadit danin go lei beare gárremin.
