Buidodat lassána Norggas ja eanaš ollesolbmot deddet menddo olu, mii vuorjašuhttá dearvvašvuođaeiseválddiid.
Buidodat lassána Norggas ja eanaš ollesolbmot deddet menddo olu, mii vuorjašuhttá dearvvašvuođaeiseválddiid.
Olbmot geain lea dábálaš deaddu leat gártan unnitlohkui go buidodat lassána Norggas.
Juohke njealját ollesolmmoš lea menddo buoidi, čájehit Álbmotdearvvašvuođainstituhta logut mat ilbme odne.
– Buidodaga geažil sáhttet olbmot buohccát váibmodohppehagain ja sohkardávddain, dasa lassin lea stuorát várra oažžut muhtin borasdávddaid jus lea menddo buoidi. Maiddái spirralat ja čippit gollet jus olmmoš deaddá menddo olu. Buidodat čuohcá maiddái olbmo millii, lohká Álbmotdearvvašvuođa váldodoavttir Haakon E. Meyer NTB ođasdoaimmahahkii.
Almmáiolbmot buoiddimusat
Álbmotdearvvašvuođa iskkadeapmi čájeha ahte eanemus dievddut giksašuvvet buidodagain. 25 proseantta dievdduin leat menddo buoiddit, nissoniin ges 21 proseantta.
Nuorat geardi maid buoidu. Iskkadeamit, mat leat čađahuvvon Romssas 2012-13 áigodagas, čájehit ahte nuorra ollesolbmuid searvvis kategoriserejuvvojit 21 proseantta nissoniin buoidin ja 28 proseantta dievdduin.
Ovdal leat dearvvašvuođaeiseválddit váruhan ahte mánát buidot, muhto raporttas celko ahte maŋimuš logi jagis leat logut bisson stáđisin. Sullii juohke guđát mánná deaddá menddo olu.
