– Jagi maŋŋel loahpahuvvon oahpu UiT:s leat 88 proseanta buohccidivššáriin ain Davvi-Norggas, muitala UiT Našunála guovddáža guovllumedisiinnalaš ossodagas Margrete Gaski.
– Jagi maŋŋel loahpahuvvon oahpu UiT:s leat 88 proseanta buohccidivššáriin ain Davvi-Norggas, muitala UiT Našunála guovddáža guovllumedisiinnalaš ossodagas Margrete Gaski.
Gaski lea geahčadan gosa buohccidivššárat vulget go gerget oahpuin UiT:s. Son lea geahčadan gos sii barget, lea go sis bealle- vai ollesáigge bargu, ja makkár eará bargguid sii leat váldán.
Iskkadeami lea Davvi Dearvvašvuođa ja Davvi-Norgga ovttasbargoorgána dearvvašvuođafágalaš oahpahus diŋgon, čállá Norgga árktalaš universitehta neahttasiiddus.
– Eará maid leat gávdnan lea ahte 82 proseantta sis barget ain Davvi-Norggas logi jagi maŋŋel go leat geargan oahpus. Čájehuvvo ahte oahppobáikkis lea ollu dadjat, muitala Gaski.
Nannet dakkár fálaldaga
Oahppobáiki lea dehálaš buohccidivššáriidda go de ožžot barggu.
– Oahppu duođašta dan guovlulaš beavttu gáiddusoahpahusas, nu ahte jus galgá árvvoštallat guovlulaš rievdadusaid oahpahuskapasitehtas davvin, de ferte dákkár fálaldagaid nannet, lohká Gaski.
Vuosttaš bargosadjái bisánit
2014:s siđai Finnmárkku fylkkadoavttir iskat gosa dat oahppit šadde geat válde gáiddusoahpahusa buohccidivššárfágas. Dalle gávdne ahte 92,5 proseantta buohccidivššáriin ledje ožžon barggu fylkkas maŋŋel oahppoáiggi.
– Gáiddusoahpahus addá ohppiide vejolašvuođa bargat okto – iešheanálaččat oahppat, dajai Liss Eriksen dalle.
Son rámidii suohkaniid go adde doarjagiid studeanttaide geat ledje oahpus, nu ahte sii bohte fas suohkanii go ledje geargan oahpuin. Ii lean sáhka stuora ruhtasupmis, muhto lei doarvái nannet gullevašvuođa sidjiide.
– Čájehuvvo ahte sii geat ožžot vuosttaš barggu vissis báikkis, bisánit dohko. Gáiddusoahpahusain geasuhit ohppiid ja doalahit dearvvašvuođabargiid boaittobeal guovlluin, logai Eriksen uit.no siidui.
