-Almmuhus-
OĐĐASATEanan­uđas Deanus: Barttat evakuere­juvvon 

Eanan­uđas Deanus: Barttat evakuere­juvvon 

-

-

Birrasiid 250 mehter viiddu eanan lea fierran fylkkageainnu 98 Ráttovuonas sotnabeaivvi čuovganeapmái.

Golbma olbmo leat evakuerejuvvon bartaguovllus mii lea lahkosis. Eai jáhke ovttage olbmo geavvan uđđasa vuollái. Politiijat leat iskan báikki helikopteriin ja geahččan liekkasohcankámerain.

– Mii leat evakueren golbmasa ja iskan gaskal 10 ja 15 viesu lahkosis. Dál mii leat geargan evakueremiin, muitala Finnmárkku politiijaid bargojođiheaddji Sondre Olsen Bakka NTB:i. 

Luodda lea gitta dál, ja ávžžuhit olbmuid vuodjit Kárášjoga ja Leavnnja bokte, dieđiha Stáhta geaidnodoaimmahaga johtolatguovddáš davvin. Ovdalaš diibmu viđas sotnabeaivve iđida dat dieđihedje sii dán eananuđđasa birra.

Jáhkket guhká gitta

Uđas fierai maŋŋel go luoddabargguid oktavuođas ledje bávkalan eatnama eahkeda ovdal Gállošgohpis Ráttovuonas lávvordat eahkeda. Fylkkageainnus 98 leat stuora luoddabarggut, ja leat máŋga mánu juo bávkkuhan eatnama ja sirddašan olu eatnama. Ikte lei navdimis garraseamos bávkaleapmi dán rádjai, ja dan geažil lea jáhkkimis dát eanarihttu fierran.

Dieđihuvvo ahte ain fierrá eanan báikkis ja lea várálaš doppe vánddardit.

Gielda galgá dál geologaiguin árvvoštallat guovllu. Eai dieđe vel man guhká luodda lea gitta, muhto ii oktage leat isolerejuvvon dán geažil. Árvvoštallet luotta leat guhká gitta. 

Gieldda kriisajoavku lea deaivvadan diibmu čiežas sotnabeaivve iđida čohkket buot dieđuid ja hutkat čovdosiid  johtolathástalussii.

Politiijat leat gieldán vánddardeamis lagabus go 500 mehtera uđđasis.

-Almmuhus-