-Almmuhus-
OĐĐASATEanandoarggástus vai baján?

Eanandoarggástus vai baján?

-

-

Eanan doarggista eambbo go mii diehtit ja dovdat.

Guovdageainnus gullui jumiheame badjelaš diibmu guovttis gaskavahkku. Ávvira doaimmahusas Guovdageainnus gullui dego baján čeargume, muhto go iskkaimet ášši NORSAR dutkanguovddážiin, de doalai deaivása ahte lei eanandoarggástus. Julggiide gal maid dovdui veaháš ahte eanan doarggistii.

 

Olbmot imaštalle

Johannes Schweiczer ii leat vel fuobmán ahte Guovdageainnus lei eanandoarggástus go Ávvir váldá oktavuođa NORSAR dutkanguovddážiin mii registrere iešguđetge dáhpáhusaid mat gullet eatnamii.

– Mun in leat oaidnán ahte lea leamašan doarggástus dieppe, dadjá son ja bivdá riŋget 10 minuhta geahčen. Dan botta oidnojit maiddái sosiála mediain jearahallame lea go son eanandoarggástus leamašan.

 

Nu unna doarggástus ahte ii dieđe juste gokko

– Dat doallá deaivása ahte dieppe lei hui unna eanandoarggástus sullii 18-25 km olggobealde Guovdageainnu, sáhttá son muitalit. Doarggástus lei dan mađe unni ahte dat ii dovdo daid eará mihtidanstašuvnnain go dieppe Guovdageainnus ii ge leat vejolaš dadjat man garrasit ja juste gokko dat lei, čilge Schweiczer.

 

2 viđa jagis dovdon

Maŋemus háve go Guovdageainnus lea registrerejuvvon eanandoarggástus maid olbmot nagodit dovdat lei 2010:s cuoŋománu 24. beaivve ja dalle lei 3.3 garra doarggástus. Dán jagi gal lei Kárášjogas maid eanandoarggástus čakčamánu 1. beaivvi mii lei ges 2,7 garra doarggástus.

 

Eanan doarggista ja eat mearkkaš ge

Jus iská NORSAR neahttasiidduin de leat doppe dieđut goas ja gos eanandoarggástusat leat registrerejuvvon. Guovdageainnus lea eanan registrerejuvvon lihkadeame juo njelljii dán jagi.

-Almmuhus-