-Almmuhus-
-Almmuhus-
SIDE1Eanandoallo­direktoráhta boazodoallo­ossodaga ođđa direktevra

Eanandoallo­direktoráhta boazodoallo­ossodaga ođđa direktevra

-

-

Eanandoallodirektoráhta lea virgádan Widar Skogan boazodoalloossodaga ođđa direktevran.

Widar Skogan (58)  Báhccavuonas eret šaddá Eanandoallodirektoráhta boazodoalloossodaga ođđa direktevra. Son álgá bargui  borgemánu 15. beaivvi ja su kánturbáiki lea Álttás.  

Ilus go lea váldán vuostá virggi

Widar Skogan dovdá bures eanandoalu, go son lea earret eará boanda ja lea leamaš stáhtačállin Eanandoallo- ja biebmodepartemeanttas ráđđehusmolsuma rádjái, diimmá čavčča.

– Mii leat ilus go Widar lea váldán vuostá  virggi. Mii oažžut buori jođiheaddji geas lea vásáhus movt hábmet eanandoallopolitihka ja son lea guhká bargan eará máŋggabealálaš politihkalaš bargguid. Dat lea earenoamáš ávkkálaš midjiide min ráđđeaddidoaimmaide eanandoallo- ja biebmodepartemeantta hárrái. Skoganis lea leamaš iešguđetlágan rollat mas leamaš lagaš oktavuođat boazodollui ja dovdá dan ealáhusa bures, dadjá adm. direktevra Jørn Rolfsen Eanandoallodirektoráhtas preassadieđáhusas.

Boanda ja máŋga oahpu

Skoganis lea oahpaheaddji oahppu, mediaoahppu ja biologiija. Son lea leamaš earret eará oahpaheaddji, rektor, fylkkaráđđi Tromssas ja sus lea nana politihkalaš vásáhus suohkanis ja fylkkadikkis. 

Son lea boanda ja sus lea badjel 20 jagi vásáhus sávzadoalus ja mielkebuvttadeamis. 

Bajimus ovddasvástádus boazodoalus

Ođđa direktevrras, Widar Skoganis, šaddá bajimus ovddasvástádus hálddašit ja ovddidit daid guovddáš boazodoallopolitihkalaš gaskaomiid, ja maiddái boazodoallostivrra, boazodoalu ovddidanfoandda ja mearkaáššiid váiddalávdegotti čállingoddedoaimmaid. 

Skogan boahtá Liv Berit Hætta sadjái, Hætta manná eará virgái Eanandoallodirektoráhtas. 

-Almmuhus-