Vuolit-Molleža duottarstobu eaiggát almmuhii iežas eamida «Duottar Dronnega» luođi suoli Facebookii. Dál lea luohti šaddame «hittan».
Vuolit-Molleža duottarstobu eaiggát almmuhii iežas eamida «Duottar Dronnega» luođi suoli Facebookii. Dál lea luohti šaddame «hittan».
Per Edvard Johnsen eamit Randi Varsi Johnsen ávvudii 5O-jagi beaivvi iežaset duottarstobus guovdu Finnmárkku duoddara. Dan oktavuođas dat almmuhii isit eamidis luođi iežas Facebook siidui.
– Mun dahken dan suoli, go eamit ii leat dan háliidan. Jurddašin dál lea áigi almmuhit dan, go lea erenoamáš čáppa luohti čáppa olbmos. Nu ahte go vulggiime márkanii finadit, de suoli bidjen dan iežan Facebook siidui, bohkosa Per Edvard Johnsen.
Somá
Sámi dovddus kulturbargi ja juoigi Åsá Márgget Anti lea bidjan dán luođi iežas duppal nubbin oambeallái. Otnážii ledje juo measta 1800 oaidnán dan, ja máŋggas leat luođi rámpon ja juohkán iežaset Facebook siidui. Earret eará dán artihkkala čálli.
Luohtedahkki Åsá Márgget Anti ieš lea hui movttat go olusat orro liikome luohtái máid son lea bidjan oambeallái.
– Dál lean meahcis, nu ahte in leat oaidnán dan Facebookas. Muhto hui somá gullát ahte olusat leat geahččan filmmaža máid Piera lea juohkán iežas siiddus , dadjá Anti.
Ávvira vuorkágovva
Divrras luohti
Randi Varsi Johnsen lea hui giitevaš go lea ožžon ná čáppa luođi, muhto ii loga goasse háliidan iežas luođi almmuhuvvon.
– Lean dakkár olmmoš gii in hálit leat guovddážis, nu ahte danne ii leat leamaš nu hállu dan luođi almmuhit. Muhto lea ortnegis go juo isit dan dagai suoli, lohká Randi. Luođi lohká ge ožžon 12 jagi dás ovdal go soai náitaleigga.
– Luohti lea hui divrras munnje, go sániid leaba Åse ja mu eahkerohkki ovttas bidjan. Nu ahte dat lea hui divrras munnje, go eahkerohkki lei hui divrras olmmoš mu eallimis, muitala son.
Dá lea Randi Varsi Johnsen luohti máid olusat leat geahččan:
Joiken til “Duoddara dronnet” som hadde stor dag igår. Åsá Márgget Anti har laget joiken. nu feires det på vidda.
Posted by Per Edvard Johnsen on 29. cuoŋománu 2015
Ráhkkaneame duottardoaluide
Per Edvard Johnsen ii lean jáhkkán ná olusat oanebottas gehččet videobihtáža mas lea su eamida luohti.
– Lean ožžon hui ollu positiiva dieđuid ruovttoluotta. Ii lean gusto nu váralaš dan almmuhit, go eamit gal dál dušše mojohallá dál beavdeguoras, čaibmá Per Edvard, gii dál lea ráhkkáneame Vuolit-Molleža duottarstobu «Giđđa Idja» doaluide mat álget ihttin gos čuojaha dovddus Felgen Orkester, ja lávvordaga ges lea oaggungilvu ja eahkes ges «After Fishing» gos čuojahit Nostalgiija Gánddat ja maiddái Sámi Grand Prix vuoiti Johan Anders Bær juoiggasta «Skomáhkár Ánde» luođi.
– Dieđus gullát maiddái «Duottar Dronnega» luođi, dadjá Per Edvard Johnsen.
