Guovtti jagis leat gárrenvuoddjit lassánan badjel beliin.
Guovtti jagis leat gárrenvuoddjit lassánan badjel beliin.
Diibmá bissehedje johtolatpolitiijat 2253 olbmo geat vudje gárrenoaivvis.
Johtolatpolitiijaid logut čájehit ahte gárrenvuoddjit leat lassánan 53 proseanttain guovtti jagis.
– Mii leat dávjjit bearráigeahččan biilavuddjiid ja ođđa rusttegiiguin lea álkit fuomášit maiddái biilavuddjiid geat vudjet vaikke leat váldán dálkasiid dahje narkotihka, lohká johtolatpolitiijaid hoavda Runar Karlsen P4 ođđasiidda.
Oktiibuot 9000 válddahalle
Maiddái politiijaguovllut bissehit oallugiid geat vudjet gárrenoaivvis, ja dasa lassin válddahallet gárrenvuoddjit jus lihkohisvuođat deaividit.
Jus buot loguid bidjá oktii, de válddahalle birrasii 9000 olbmo vuodjimis gárrenoaivvis 2017:s.
Johtolatpolitiijaid hoavda dadjá iežaset áigut joatkit dárkkistemiid vai eastadivččii ja bissehivččii gárrenolbmuid vuodjimis mohtorfievrruiguin.
– Riska válddahallat galgá šaddat dan mađe stuorisin ahte unnit olbmot dustet vuodjit gárrenoaivvis, lohká Karlsen.
