Oahpposadjeohccit leat lassánan 8 proseanttain diimmá rájes.
Oahpposadjeohccit leat lassánan 8 proseanttain diimmá rájes.
Finnmárkku fylkkagielddas leat dán jagi 442 ohcci fitnodagaid oahpposajiide.
Dat lea lassánan 8 proseanttain diimmá rájes jus buohtastahttá singuin geain lei oahpposadji vuosttaš sávaldahkan.
Dán jagáš ohcciin lea 316:s riekti oažžut viidáseappot oahpu nuoraidrievtti vuođul.
Eambbo dearvvašvuođabargit, unnit elektrihkkárat
Ohccit leat 50 iešguđet oahppofágas. Daid oahppofágaide gosa leat eanemus ohccit dán jagi lea dearvvašvuođafágii, elektrihkkárfágii ja snihkkárfágii.
Dearvvašvuođafágas leat diimmá ektui lassánan ohccit, dál leat 59 ohcci ja diibmá fas 40:s. Elektrihkkárfágas fas veahá njiedjan, 41 ohcci dán jagi, 47 ohcci fas diibmá.
Sekšuvdnajođiheaddji Toni E. Håvardsrud jáhkká oahpposajiid váikkuhan ohppiid ohcamis.
– Dat lea ovddit jagiid leamaš hástaleaddji gávdnat oahpposajiid elektrihkkáriidda, dat sáhttá váikkuhan ohcanválljema nuoraid gaskkas dán jagi, dadjá son preassadieđáhusas.
Šiehtat nu árrat go vejolaš
Ohcciid oppalašlistu lea dál almmolaš oahppokantuvrrain ja oahppofitnodagain, ja gaskkusteapmi lea jo álgán.
– Mii sávvat ahte nu máŋggas go vejolaš vuolláičállet oahpposoahpamuša dahje oahpahussoahpamuša dál giđđat ja geasset. Vássán jagiid leat vásihan ahte soahpamušat dahkkojit ain miehtá čavčča, loahpaha Toni.
