Ođđa loguin, maid Mediabearráigeahčču almmuhii odne, boahtá ovdan ahte eambbosat guldalit lagasrádioid. Seammás leat unnánat geat guldalit radio.
Ođđa loguin, maid Mediabearráigeahčču almmuhii odne, boahtá ovdan ahte eambbosat guldalit lagasrádioid. Seammás leat unnánat geat guldalit radio.
Logut maid Kantar Media lea čohkken, čájehit ahte eanaš lagasrádioin lassánit guldaleaddjit.
Obbalaččat leat 20 proseantta eambbo guldaleaddjit lagasrádioin go loahpas ovddit jagi ledje. Dan dieđiha Mediabearráigeahčču preassadieđáhusas.
– Dát čájeha ahte digitála rádiomolsun lea leamaš oassin manne eambbosat guldalit lagasrádioid, lohká Mediabearráigeahču direktevra Mari Velsand.
Njealji guđa guovllus lassánan
Go 2017 njealját kvartála loguid buohtastahttá 2016 njealját kvartála loguiguin, de oaidná ahte njealji guđa guovllus leat lassánan lagasrádio guldaleaddjit.
Nordlánddas lassánii 7,3 proseanttas 8,6 prosentii.
Østfoldas, Vestfoldas, Oslos ja Akershusas lea njiedjan 14,9 proseanttas 8,9 prosentii. Dan ferte geahččat oktan dainna dieđuin ahte guovddáš kanálat, nu go P5, P7 Klem ja NRJ, eai lean mihtideamis mielde 2017 njealját kvartálas.
Maiddái Romssas ja Finnmárkkus lea njiedjan 8,1 proseanttas 7,4 prosentii. Dán guovllus jáddadedje stuorámus kanálat FM-signalaid juovlamánu 13. beaivvi, ja duohta váikkuhusa eai oainne ovdal go 2018 vuosttaš kvartála logut leat gárvásat.
Obbalaš lohku njiedjá
Vaikke lagasrádioid guldaleaddjilogut lassánit, de njiedjá obbalaš guldaleaddjilohku. Dušše Romssas ja Finnmárkkus guldaledje eambbosat rádio 2017 njealját kvartálas go jagi ovdal. Lassáneapmi lei 65,2 proseanttas 67,4 prosentii.
Čuvvot mielde
Mediabearráigeahčču vuordá ahte obbalaš guldaleaddji lohku lassána ja dasto bissu stáđisin dán jagi.
– Mii čuovvut ovdáneami, vai oaidnit movt guldaleaddjit ja rádiomárkan heivehit dan ođđa rádioduohtavuhtii. Mihttun ferte leat ahte galgá ovdánanmunni sihke riikaviidosaš ja lagasrádioin. Dat lea dehálaš máŋggabealatvuođa ja cealkinfriddjavuođa dihte, lohká Velsand.
