Vuosttaš jahkebeale dán jagis leat dieđihuvvon 866 givssidanášši stáhtahálddašeddjiide. Dat lea 16 proseantta eambbo go diibmá. Ovcci ášši logi áššis mat gieđahallojuvvojedje, čájehuvvo ahte skuvllas eai leat bargan doarvái áššiiguin.
– Min skuvllat galget oadjebassan. Oahppit geat vásihit givssideami galget dovdat ahte skuvla váldá ášši duođalažžan. Logut čájehit ahte mii šaddat eambbo bargat givssideami eastademiin, ja bargat dan ovdii ahte skuvllat šaddet čeahpit dustet stuora ja lossa áššiid, muitala máhttominister Tonje Brenna (Bb) preassadieđáhusas.
Ráđđehus áigu bargat dan ovdii ahte eastadit givssideami. Oahppodirektoráhtas áigot árvvoštallat makkár gelbbolašvuođa skuvllat, ja maiddái mánáidgárddit, dárbbašit go galget eastadit ja bissehit givssideami. Dál áigot Oahppodirektoráhtas geahččat vuhtiiváldon váidagiid, vai oidnet maid sáhttet buoridit.
Eambbo váidagat váldojit vuhtii
2017 rájes leat oahppit mánáidskuvladásis gitta joatkkaskuvladássái ieža sáhttán váidit givssidanáššiid stáhtahálddašeaddjái, go dovdet ahte ii leat oadjebas skuvladilli.
2022 giđa ledje 866 váidaga dieđihuvvon stáhtahálddašeddjiide. Lohku lea lassánan go geahččá pandemiija jagiin, 2021:s ledje 744 váidaga ja 2020:s ledje 590 váidaga.
Áššit mat gieđahallojuvvojedje 2022 giđa, leat 93 proseantta áššiin vuhtii váldon, go čájehuvvui ahte skuvllat leat rihkkon doaibmangeatnegasvuođa ja skuvllat eai leat doarvái bures gieđahallan áššiid.
– Mun vuorjašuvan dainna go oahppit dovdet ahte skuvllat eai veahket sin, seammás lea hui buorre ahte eambbosat dihtet dieđihanortnega birra ja váidet stáhtahálddašeaddjái. Dieđihanortnet lea dehálaš sihkkarvuođafierpmádat, jus skuvllas eai leat doarvái čeahpit láhčit oadjebas skuvlabirrasa ohppiide, čilge Brenna.
