-Almmuhus-
OĐĐASATEambbosat čuvvo ođas­gova diibmá

Eambbosat čuvvo ođas­gova diibmá

-

-

Olu jagiid leat TV-geahččit ja radioguldaleaddjit njiedjan, muhto 2020:s bisso logut stáđisin. Lassi olbmot gehčče ja guldaledje guovlluođđasiid ja eambbosat lohke maid neahttaaviissaid. 

Diibmá šadde olbmot bissut eanet ruovttuin go dábálaččat. Koronadoaibmabijuid geažil han ledje mánáidgárddit, skuvllat ja universitehtat gitta muhtin áigodagaid. Dasa lassin šattai stuora oassi Norgga álbmogis bargat ruovttus. 

– Olbmuid beroštupmi ođđasiidda lassána go stuora áššit bohciidit máilmmis. Dasa lassin bisuhit olbmot iežaset mediavieruid muhtin áigge, dadjá Norgga mediabaromehtera statistihkkaovddasvástideaddji Emma Schiro Statistihkalaš guovddášdoaimmahahkii. 

Stuora oassi olbmuin geat diibmá gehčče TV válljejedje geahččat ođđasiid mat sáddejuvvojedje njuolgga. Ođasgehččiid lohku lassánii 53 proseanttas 62 prosentii 2019:i ektui. Maiddái radioguldaleddjiin válljejedje eambbosat guldalit ođđasiid. 

Vuollil bealli geahččá TV

Vaikke eambbosat gehčče ođđasiid TV:s, de eai lassánan gal geahččit árbevirolaš TV-kanálain. 

Maŋimuš logi jagi leat sakka unnit olbmot geahččan njuolggo TV. Vuollel 80 proseantta válljejedje TV geahččat beaivválaččat 2012:s, ja ovddit jagi ledje geahččit njiedjan 48 prosentii. Diibmá bisui lohku stáđisin. 

– Dán ektui oaidnit ahte koronapandemiija lea váikkuhan TV-gehččiid. Vuosttaš áigodaga 2020:s jotke TV-gehččiidlogut njiedjat nu go leat dahkan maŋimuš logi jagi, muhto maŋŋel go koronavirus leavvagođii, de bissugohte logut stáđisin. Dalle eai šat válljen olbmot eret árbevirolaš TV-kanálaid, lohká Schiro. 

Radioguldaleaddjit leat njiedjan 2014:i rájes, ja maiddái dát treanda bisánii 2020:s. Dalle vástidedje 49 proseantta ahte guldaledje rádio beaivválaččat. 

Lohkkit sirdet nehttii

Báberaviissaid lohke 85 proseantta álbmogis 1994:s, muhto dan rájes leat lohkkit njiedjan. 2020:s vástidedje 24 proseantta ahte lohket báberaviissaid beaivválaččat, lohkkit leat njiedjan golmmain proseanttain ovddit jagi ektui. 

Seammás lassánit olbmot geat lohket ođđasiid interneahtas, ja ođaslohkkit sihke báber- ja neahttaaviissain lassánedje 73 proseanttas 77 prosentii 2019:i rájes. 

– Dát čájeha ahte olbmuide leamaš dehálaš čuovvut ođasgova 2020:s. Neahttaaviissain lassánedje abonneanttat 26 proseanttas 29 prosentii diibmá, dadjá Schiro. 

Čuvvot ođđasiid sosiála mediaid bokte

92 proseantta Norgga álbmogis geavaha interneahta, ja badjel bealli dáin – 44 proseantta – gávdnet ja lohket ođđasiid sosiála mediain. 

– Eanaš nuorat lohket dahje gehččet ođđasiid sosiála mediain. 16-19 jahkásaččaid searvvis dahket 69 proseantta dan, muitala Norgga mediabaromehtera statistihkkaovddasvástideaddji Emma Schiro. 

Snapchat ja Facebook bokte lohket eatnašat ođđasiid. Facebook lea eanemus bivnnut sin gaska geat leat badjel 20 jagi. Snapchat ges geavahit eanemusat nuorat, geat leat vuollel 20 jagi, go lohket ođđasiid. 

-Almmuhus-