Stáda geaidnodoaimmahat dárkkistii boagán – ja jealbmageavaheami badjelaš 120.000 vuddjiin vuosttaš jahkebealis.
Buohtastahtton diimmá jahkebealloguiguin, sáhkkohalle badjelaš 200 eambbo vuoddji vuosttaš 2022 jahkebealis, dieđiha Stáda geaidnodoaimmahat preassadieđáhusas.
– Boagángeavaheapmi lea okta dain álkimus johtolatsihkkarasttimiin mat gávdnojit, ja lea balddihahtti go leat sáhkuhan eambbogiid dán jagi go diibmá, lohká Jan Erik Myhr Stáda geaidnodoaimmahagas.
Stáda geaidnodoaimmahaga lihkohisvuođaguorahallamiin čájehuvvo ahte njeallje logádasoasi olbmuin jápminlihkohisvuođain, sii eai atnán biilaboahkána.
