Birrasiid 12 000 bargguhis olbmot masset dán jagi beaiveruđa go leat leamašan barggu haga eambbo go guokte jagi.
Birrasiid 12 000 bargguhis olbmot masset dán jagi beaiveruđa go leat leamašan barggu haga eambbo go guokte jagi.
– Mii háliidit diehtit eanet dáid olbmuid birra, muitala bargo- ja sosiálaministtar Anniken Hauglie (O) NTBii.
Geasset biddjui bargojoavku Navas geat galget kártet guhkit áigge bargguhis olbmuid ja gávnnahit maid sii dahket go leat guovtti jagi ráji badjel mannan go sáhttá oažžut beaiveruđaid. Bargu galgá loahpahuvvot dán čavčča.
Kártet dárbbuid
– Ulbmil lea kártet geat sii leat, makkár dárbbut sis leat ja makkár veahki sii dárbbašit vai sáhttet gávdnat barggu, muitala Hauglie.
Ráđđehus jáhkká gaskal 1000 ja 2000 eanet olbmot olahit beaiveruđaráji diimmáža ektui, boahtá ovdan čálalaš vástádusas maid Hauglie lea vástidan Guovddášbellodaga Geir Pollestad jearaldahkii.
Hauglie muitala ahte sii geat sáhttet massit rievtti oažžut beaiveruđa leat sullii 1,5 proseantta mánnosaččat buohkain geat leat barggu haga.
– Njealjis logis ožžot barggu guovtti mánu siste. Ollugiin sis geat leat guhkit áiggi barggu haga ii leat nu alla formálalaš gelbbolašvuohta, muitala Hauglie.
Ollu olgoriikkalaččat fárrejit
Ekonomalaš sosiálaveahkki lea maŋemus čoavddus sidjiide geat masset beaiveruđaid ja eai sáhte ealihit iežaset.
– Muhto mii diehtit ahte ollugat gávdnet barggu go leat leamaš guokte jagi barggu haga, dahje ealihit seston ruđain. Muhtimat mannet ahkepenšuvdnii, bargočielggadandoarjagii dahje bargonávccahisaodjui, ja stuora oassi olgoriikkalaččain válljejit fárret ruovtturiikii fas, muitala Hauglie.
Ráđđehus ii dieđe man galle olgoriikkalačča bargi leat geat válljejit vuordit gitta eai šat oaččo beaiveruđaid Norggas ovdal go fárrejit.
– Muhtin báikkiin Norggas, nu movt Rogalánddas, lea stuora oassi dán joavkkus EØS-ássit, muitala Hauglie. (©NTB)
